موسەننا ئەمین ئەندامی پەرلەمانی عێراق ئاشکرایکرد، لە پرۆژەیاسای بودجەدا تەنها گرەنتیی مووچەی مووچەخۆرانی هەرێمی کوردستان کراوە و هیچکام لەو مافە داراییەکانی دیکە لەبەرچاو نەگیراون کە لەلایەن ئۆپۆزسیۆن و هەردوو حیزبی دەسەڵاتدارەوە داواکرابوون.

لە میانی بەشداریکردنی لە بەرنامەی "رۆژەڤ"ی کەی ئێن ئێن، موسەننا ئەمین ڕایگەیاند؛ بەپێچەوانەی دەنگۆکانەوە، مووچەی مووچەخۆرانی هەرێم بۆ هەموو ساڵەکە مسۆگەرە و ئەو قسانە دوورن لە ڕاستییەوە کە دەڵێن لە ساڵی داهاتوودا تەنها شەش مووچە دابەش دەکرێت.

هاوکات نیگەرانیی خۆی لە نەبوونی یەکسانی لەنێوان فەرمانبەرانی هەرێم و عێراقدا دەربڕی و ئاماژەی بەوە کرد، کە مووچەخۆرانی هەرێم جیاواز لە عێراق ماوەی زیاتر لە 12 ساڵە پلەبەرزکردنەوەیان ڕاگیراوە و هێشتا پرسی دەستپێکردنەوەی پلەبەرزکردنەوە یەکلایی نەبووەتەوە.