کۆمەڵەی بانکە تایبەتەکانی عێراق دڵنیایی دەدات کە بانکی ناوەندی سەرجەم داواکارییەکانی حەواڵەکردنی دۆلار بۆ دەرەوەی وڵات جێبەجێ دەکات و یەدەگێکی زۆر و پتەوی دراوی هەیە، بەوەش ئاراستەی بازاڕ بەرەو سەقامگیریی نرخی دۆلار دەڕوات.

عەلی تاریق، بەڕێوەبەری جێبەجێکاری کۆمەڵەکە ڕایگەیاند؛ هەرچەندە دۆخی ئەمنی و سیاسی کاریگەرییان لەسەر نرخی دۆلار لە بازاڕدا هەیە، بەڵام توانای بانکی ناوەندی بۆ پڕکردنەوەی خواستەکانی بازاڕ ئەو کاریگەرییانە کەمدەکاتەوە و دۆخەکە جێگیر دەکات.

لەبارەی سزادانی بانکەکانیشەوە ئاماژەی بەوە کرد، لە ئێستادا سەرجەم بانکەکانی عێراق پابەندن بە ستاندارد و پێوەرە ناوخۆیی و نێودەوڵەتییەکان، هیواشی خواست لە قۆناغی داهاتوودا هیچ سزایەکی دارایی نوێ بەسەر عێراقدا نەسەپێنرێت.