پێشبینییەکانی کەشوهەوا ئاماژە بە گۆڕانکارییەکانی چەند ڕۆژی داهاتوو دەکەن، بە جۆرێک لەمڕۆوە ئەگەری نمەباران لە ناوچە شاخاوییەکانی هەرێمی کوردستان هەیە و لە ناوەڕاستی هەفتەشەوە شەپۆلێکی بارانبارین و هەورەبرووسکە ناوچە جیاوازەکانی عێراق و هەرێم دەگرێتەوە.

بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان بڵاویکردەوە، ئەمڕۆ یەکشەممە ئاسمان نیمچەهەور دەبێت و لە ناوچە شاخاوییە بەرزەکان ئەگەری پرووشکەباران هەیە، لەگەڵ کەمێک نزمبوونەوەی پلەکانی گەرما. بۆ سبەی دووشەممەش، ئاسمان ساماڵ دەبێت و پلەکانی گەرما یەک بۆ دوو پلە بەرز دەبنەوە.

هاوکات دەستەی کەشناسیی عێراق ڕایگەیاندووە، لە ڕۆژی سێشەممەوە کەشوهەوا دەگۆڕێت و لە بەشەکانی ڕۆژئاوا باران دەبارێت. شەپۆلەکە لە ڕۆژانی چوارشەممە و پێنجشەممە فراوانتر دەبێت و بە شێوەی بارانی مامناوەند و هەورەبرووسکە، سەرانسەری ناوچەکانی باکوور، ناوەڕاست و باشوور دەگرێتەوە، هەروەها پلەکانی گەرماش کەمێک نزم دەبنەوە.