بۆ یەکەمجار دوای زیاتر لە دوو سەدە، ئەندازیارێکی بواری زیرەکیی دەستکرد توانی نامەیەکی نهێنی و کۆدکراوی سەربازیی سەردەمی ناپلیۆن پۆناپارت شیبکاتەوە، کە بۆ زیاتر لە 200 ساڵ مەتەڵێکی ئاڵۆز بووە و نەتوانراوە بخوێندرێتەوە.

کارتەر چەرچ، ئەندازیار لە کۆمپانیای 'سێنتینێلوەن'ی تایبەت بە ئاسایشی ئەلیکترۆنی، مۆدێلی (Astra GPT-6)ی کۆمپانیای 'ئۆپن ئەی ئای' بەکارهێناوە. مۆدێلەکە لە ماوەی نزیکەی شەش کاتژمێردا وێنەکەی گۆڕیوە بۆ دەق و کۆدەکانی نامەکەی ساڵی 1809ی کردووەتەوە، کە بە فەرمانی ناپلیۆن لەلایەن یوجین دی بۆهارنێ بۆ جەنەڕاڵ ئۆگست دی مارمۆنت نێردراوە.

زیرەکییە دەستکردەکە سەرجەم کارەکانی بەتەنیا ئەنجامداوە؛ لە خوێندنەوەی 175 هێمای دەستنووس و شیکردنەوەی جێگرەوە دەنگییەکانەوە تا دەگاتە بەراوردکردنی زانیارییەکان لەگەڵ تۆمارە مێژووییەکاندا، کە بەهۆیەوە پێگەی هێزەکانی باڤاریا، پۆڵەندا و فەرەنسای ئاشکرا کردووە.

نامەکە کە پێش جەنگی نێوان فەرەنسا و نەمسا نێردراوە، باس لەوە دەکات کە ڕووسەکان بەرەو نەمسا پێشڕەوی دەکەن و سوپای فەرەنساش 80 هەزار سەربازە. لە بەشێکی نامەکەدا هاتووە: "نەمسا ڕووبەڕووی هێرشێکی هەمەلایەنە دەبێتەوە و بەرەو لەناوچوون دەچێت، بۆیە لە کاتی پێشڕەویدا با چەند یەکەیەکی بچووک یان کۆمەڵە کەسێک نەتترسێنن."