وەزارەتی بازرگانی و پیشەسازی و نوێنەری بازرگانان تاوتوێی کاریگەرییەکانی گۆڕانکاریی نرخی دۆلار لەسەر بازاڕ دەکەن، داواش لە بەغدا دەکرێت ڕسووماتی گومرگی لەسەر هەندێک کاڵا و ماددەی خۆراکی هەڵبگرێت بۆ ڕێگریکردن لە بەرزبوونەوەی نرخەکان و پاراستنی بژێویی هاووڵاتییان.

لە کۆبوونەوەیەکدا کە ئەمڕۆ دووشەممە بە بەشداریی بریکاری وەزارەتی بازرگانی، بەڕێوەبەری گشتیی بازرگانی، لقی هەولێری هاوردە و ناردنکاران و ژووری بازرگانی بەڕێوەچوو؛ گفتوگۆ لەسەر دۆخی بازاڕ، ئاسانکاریی گومرگی بۆ بازرگانان و دابینکردنی پێداویستییەکان بە نرخی گونجاو بۆ خەڵک کرا.

ڕەسووڵ حاجی عومەر، سەرۆکی لقی هەولێری هاوردە و ناردنکاران جەختی کردەوە، پێویستە بازرگانان لە دیاریکردنی نرخدا دۆخی ئابووریی هاووڵاتییان لەبەرچاو بگرن و لە بەرزکردنەوەی نادروستی نرخەکان دوور بکەونەوە. هاوکات نوێنەری بازرگانانیش کێشە و گرفتەکانیان خستەڕوو بەمەبەستی دۆزینەوەی چارەسەری گونجاو لای لایەنە پەیوەندیدارەکان.