شەپۆلێکی نوێی کەشوهەوا ناوچە جیاوازەکانی هەرێمی کوردستان و عێراق دەگرێتەوە، پێشبینی دەکرێت لە ئەمڕۆوە بارانبارین دەست پێ بکات و پلەکانی گەرماش ڕوو لە دابەزین بکەن، هاوکات لە هەندێک ناوچە ئەگەری بەرزبوونەوەی تۆز و خۆڵ هەیە.

بەپێی پێشبینییەکانی کەشناسیی هەرێم، ئەمڕۆ ئاسمان بەگشتی نیمچەهەور دەبێت و لە ناوچەکانی هەولێر تا دەگاتە کۆیە ئەگەری تاوەباران و هەورەبرووسکەی کورتخایەن هەیە. هاوکات ئاراس جەبار، شارەزای کەشناسی ئاماژە بەوە دەکات؛ دوای نیوەڕۆی سبەی دووشەممە، شەپۆلێکی هەورەبرووسکە و تاوەباران سنووری پارێزگای دهۆک و ئیدارەی زاخۆ دەگرێتەوە و پلەکانی گەرماش بەتێکڕا یەک بۆ دوو پلە دادەبەزن.

لە لایەکی دیکەوە، دەستەی کەشناسیی عێراق ڕایگەیاندووە، سبەی بەهۆی گۆڕانی ئاراستەی با و چالاکبوونییەوە بەتایبەت لە ناوچەکانی ناوەڕاست و خۆراوا، ئەگەری بەرزبوونەوەی تۆزێکی سووک هەیە. سەبارەت بە پلەکانی گەرماش سبەی دووشەممە لە هەولێر 28 پلە، سلێمانی 29 و دهۆک 27 پلەی سیلیزی دەبێت و نزمترین پلەش لە حاجی ئۆمەران دەبێت کە 19 پلەیە.