مەسعود پزیشکیان سەرۆک کۆماری ئێران ڕایدەگەیەنێت، وڵاتەکەی لە پێگەی لاوازیدا نییە و بەباشی دەزانێت چۆن بەرگری لە خۆی دەکات، هاوکات ئاشکرای دەکات کە لە کاتی بەڕێوەچوونی دانوستانەکان لەگەڵ واشنتن، ئەمریکا و ئیسرائیل جەنگیان دژیان بەرپا کردووە.

لە وتەیەکدا لە کۆنفڕانسی یەکڕیزیی ئیسلامی لە تاران، سەرۆک کۆماری ئێران جەختی لەوە کردەوە کە بەرگریکردن لە وڵاتەکەیان مافێکی ڕەوایە و ئەو مافەیان بەکارهێناوە. ڕاشیگەیاند، تارن دەستپێشخەری جەنگ نەبووە، بەڵکو بە توندی بەرەنگاری دەستدرێژیکاران بووەتەوە و بەرگری لەخۆی کردووە.

لەسەر ئاستی ناوچەکەش، سەرۆکی ئێران ڕەتکردنەوەی داگیرکاری و بەرگریکردنی لە فەڵەستین بە ئەرکێکی سەرشانی وڵاتەکەی ناوبرد، هاوکات داوای لە وڵاتانی ئیسلامی کرد کە خۆیان ئەرکی بەڕێوەبردنی ئاسایشی ناوچەکە بگرنە ئەستۆ و بەڵێن بدەن کە نابنە هۆکاری تێکدانی ئاسایشی یەکتر.