عەلی فالح زەیدی، سەرۆک وەزیران و فەرماندەی گشتیی هێزە چەکدارەکانی عێراق، بڕیاریدا بە توندکردنەوەی ڕێکارە ئەمنییەکان و دەستگیرکردنی تاوانبارانی ڕووداوەکەی ناوچەی دۆرە، هاوکات جەخت لە بەردەوامیی هەوڵەکانی حکومەت بۆ سەپاندنی سەروەریی یاسا دەکاتەوە.

لە بەیاننامەیەکدا کە ئەمڕۆ پێنجشەممە بڵاویکردووەتەوە، زەیدی پرسە و سەرەخۆشیی خۆی بۆ کوژرانی دوو کارمەندی ئەمنی ڕاگەیاند کە پێکهاتبوون لە (عەمید هیشام محەمەد تەڵاع) بەڕێوەبەری بەشی پۆلیسی ئەمینداریەتی لە دیوی کەرخ و (خالید عەباس لەفتە)ی کارمەندی پۆلیس. ئاماژەی بەوەشکردووە، ئەو دوو کەسە لە کاتی یاوەریکردنی مەفرەزە خزمەتگوزارییەکان بۆ لابردنی زێدەڕۆییەکانی دەوروبەری ناوچەکانی دۆرە، کەرارە و گەڕەکی دیجلە لە باشووری بەغدا، لەلایەن "کەسانی لەیاسادەرچووەوە" کراونەتە ئامانج، جەختیشیکردەوە کە خوێنیان بەفیڕۆ ناچێت.

سەرۆک وەزیرانی عێراق ڕاشیگەیاندووە: "ئەم هێرشانە بۆ سەر دامەزراوە ئەمنی و خزمەتگوزارییەکان لە کاتی جێبەجێکردنی ئەرکە فەرمییەکانیاندا، حکومەت سارد ناکاتەوە لە بەردەوامبوون لە هەوڵەکانی بۆ سەپاندنی سەروەریی یاسا و ڕاوەدوونانی تێکدەرانی ئاسایشی وڵات و هاووڵاتییان."

لە کۆتاییدا، فەرماندەی گشتیی هێزە چەکدارەکان فەرمانی بە دەزگا ئەمنییەکان کردووە شوێنی ڕووداوەکە گەمارۆ بدەن و بەبێ هیچ چاوپۆشییەک ئەنجامدەرانی ئەو کارە تاوانکارییە دەستگیر بکەن و ڕادەستی دادگایان بکەن. هەروەها ڕایگەیاندووە کە بە وردی چاودێریی ڕەوشی تەندروستیی بریندارەکانی وەزارەتی ناوخۆ و فەرمانبەرانی ئەمینداریەتیی بەغدا دەکەن.