ئەحمەد هیلالی، جێگری پارێزگاری حەسەکە و وتەبێژی تیمی سەرۆکایەتیی ڕاسپێردراو بۆ تێکەڵکردنی هێزەکانی سووریای دیموکرات (هەسەدە)، ڕایدەگەیەنێت؛ پرۆسەی تێکەڵکردنی دامەزراوە سەربازی، ئەمنی و مەدەنییەکان بە دامەزراوەکانی دەوڵەت گەیشتووەتە قۆناغێکی پێشکەوتوو و ئاماژە بەوەش دەکات کە هەڵوەشاندنەوەی بەڕێوەبەریی خۆسەر لە نزیکبوونەوەدایە.

لە لێدوانێکدا بۆ تەلەفزیۆنی سووریا، ئەحمەد هیلالی ئاشکرایکرد، قۆناغە سەختەکانیان تێپەڕاندووە و لە ڕووی ڕێکارە جێبەجێکارییەکانەوە لەسەر ئەرزی واقیع هەنگاوی گەورەیان بڕیوە.

وتەبێژەکەی تیمی سەرۆکایەتی ڕوونیشیکردەوە، لە ماوەی ڕابردوودا کاریان لەسەر چارەسەرکردنی بەشێک لە ئاڵەنگارییەکان کردووە، کە دیارترینیان دۆسیەی دادوەری بووە، جەختیشیکردەوە: "ڕاگەیاندنی هەڵوەشاندنەوەی ئیدارەی خۆسەر زۆر نزیک بووەتەوە."