بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان، ڕەوشی کەشوهەوای ئەمڕۆ یەکشەممە و سبەینێ دووشەممەی ڕاگەیاند؛ بەپێی پێشبینییەکان پلەکانی گەرما لە سەرتاسەری هەرێم بە شێوەیەکی بەرچاو نزم دەبنەوە و ئاسمان بەگشتی ساماڵ دەبێت.

بەڕێوەبەرایەتییەکە ئاماژەی بەوە کردووە، ئەمڕۆ یەکشەممە (16ی ئابی 2026)، ئاسمان ساماڵ دەبێت، خێرایی با مامناوەند دەبێت لە نێوان (15 بۆ 20) کیلۆمەتردا لە کاتژمێرێکدا و ئاراستەکەی بەرەو باکووری ڕۆژهەڵات دەبێت. هاوکات مەودای بینین لە نێوان (8 بۆ 9) کیلۆمەتردا دەبێت و پلەکانی گەرما بەراورد بە ڕۆژانی پێشوو نزیکەی (1 بۆ 3) پلەی سیلیزی نزم دەبنەوە.

سەبارەت بە کەشوهەوای سبەینێ دووشەممە (17ی ئابی 2026)، کەشناسیی هەرێم پێشبینی دەکات ئاسمان ساماڵ و پەڵەهەور بێت، لەگەڵ نزمبوونەوەی زیاتری پلەکانی گەرما بە بڕی (1 بۆ 3) پلەی سیلیزیی دیکە، خێرایی باش لە نێوان (10 بۆ 20) کیلۆمەتردا دەبێت لە کاتژمێرێکدا و مەودای بینین دەگاتە (9 بۆ 10) کیلۆمەتر.

بەپێی پێشبینییەکان، بۆ سبەینێ دووشەممە، نزمترین پلەی گەرما لە هەرێمی کوردستان لە حاجی ئۆمەران دەبێت کە دەگاتە (26) پلەی سیلیزی و بەرزترین پلەش لە گەرمیان دەبێت بە (42) پلە. هەروەها پلەی گەرمای سەنتەری پارێزگاکانیش بەم شێوەیە دەبن؛ هەولێر (38)، سلێمانی (37)، دهۆک (36)، و هەڵەبجە (38) پلەی سیلیزی دەبن.