بڕیارە لە پێناو کردنەوەی گەرووی هورمز زیاتر لە 30 وڵات کۆبوونەوەیەکی ئۆنلاین ساز بکەن و هەوڵە سیاسی و دیپلۆماسییەکانیان بەو ئاراستەدا بخەنەگەڕ. ئەمریکا بەشداری کۆبوونەوەکە ناکات.

کیەر ستارمەر سەرۆکوەزیرانی بەریتانیا رایگەیاند، ئەمڕۆ بە بەشداری 36 وڵات کۆبوونەوەیەکی ئۆنلاین بە مەبەستی تاوتوێکردنی هەوڵە سیاسی و دیپلۆماسییەکان بۆ کردنەوەی گەرووی هورمز بەڕێوەدەچێت.

وتیشی، کۆبوونەوەکە بە سەرۆکایەتی ئیڤێت کوپەر وەزیری دەرەەوەی بەریتانیا بەڕێوەدەچێت و هەموو رێوشوێنە دیپلۆماسی و سیاسییەکان بۆ گەڕاندنەوەی ئازادی کەشتیوانی و دڵنیابوون لە سەلامەتی کەشتییە گیرخواردووەکان و جوڵەی دەریایی تاوتوێ دەکرێت.

لە دوای دەستپێکردنی هێرشەکانی ئەمریکا و ئیسرائیل بۆ سەر تاران لە 28ی شوباتی ئەمساڵ، ئێران هێرشی کردە سەر ژمارەیەک کەشتیی و هەڕەشەی هێرشی زیاتریش دەکات گەر بێت و کەشتییەکان بە بێ هەماهەنگی بیانەوێت بە گەرووی هورمزدا تێپەڕن و جەختیش دەکاتەوە گەرووەکە بۆ دوژمنان و هاوپەیمانانی دوژمنانی داخراوە.

داخرانی گەرووی هورمز و شەڕ لە کەنداو بووەتە مایەی بەرزبوونەوەی نرخی سووتەمەنی لە زۆربەی ناوچەکانی جیهان و لە ئەگەری بەردەوامی ئەو دۆخە پێشبینی قووڵتر بوونەوەی قەیرانەکە دەکرێت.

ئەمریکا کە لە شەڕی دژ بە ئێران بەشدارە، ئامادەی کۆبوونەوەکەی ئەمڕۆ نابێت و وەک دوێنێ دۆناڵد ترەمپ سەرۆکی ئەو وڵاتە رایگەیاند، کردنەوەی گەرووی هورمز ئەرکی واشنتن نییە و هەر وڵاتێک خوازیاری کردنەوەیەتی با خۆی هەنگاوی بۆ بنێت.