سوپای پاسدارانی ئێران ڕایگەیاند، لە وەڵامی هێرشێکی فڕۆکە بێفڕۆکەوانەکانی ئەمریکا، بە مووشەکی بالیستی بنکەی ئاسمانیی عەلی سالم لە کوەیت و دامەزراوەکانی کەشتیگەلی پێنجەمی هێزی دەریایی ئەمریکایان لە بەحرەین کردووەتە ئامانج و هۆشداریی داخستنی گەرووی هورمز دەدەن.

بەپێی ڕاگەیەندراوەکەی سوپای پاسداران، کاتژمێر 1:30 خولەکی بەرەبەیانی ئەمڕۆ، چوار کەشتیی نەوتهەڵگر بەبێ گوێدانە هۆشدارییەکانی هێزی دەریایی سوپا هەوڵی چوونەدەرەوەی نایاساییان لە گەرووی هورمز داوە. لە ئەنجامدا، یەکێک لە کەشتییەکان کراوەتە ئامانج و ڕاگیراوە، سێ کەشتییەکەی دیکەش ناچار بە پاشەکشە کراون.

لە ڕاگەیەندراوەکەدا هاتووە، دوابەدوای ئەو ڕووداوە و لە کاتژمێر 2:30 خولەکی بەرەبەیان، فڕۆکە بێفڕۆکەوانەکانی ئەمریکا دوو تاوەری پەیوەندییان لە دوورگەی قشم و ناوچەی سیریک کردووەتە ئامانج. لە بەرامبەر ئەو هێرشەدا، هێزی ئاسمانیی سوپای پاسداران بە مووشەکی بالیستی هێرشی کردووەتە سەر بنکەی ئاسمانیی "عەلی سالم" لە کوەیت و پێگە گرنگەکانی کەشتیگەلی پێنجەمی ئەمریکا لە بەحرەین.

لە کۆتایی ڕاگەیەندراوەکەدا، سوپای پاسداران هۆشداری توند دەداتە ئەمریکا و ڕایدەگەیەنێت: "ئەگەر ئەم کارانە دووبارە ببنەوە، بە وەڵامێکی سنووردار ناوەستین و ئێوە بەرپرسیار دەبن لە لێکەوتەکانی داخستنی تەواوەتیی گەرووی هورمز بەڕووی هەناردەکردنی نەوت و غازدا."