وەزارەتی دەرەوەی ئەمریکا ڕایگەیاند، ڕەزامەندییان لەسەر ئەگەری فرۆشتنی سیستمی دژەدرۆن بە بڕی یەک ملیار و 980 ملیۆن دۆلار بە کوەیت دەربڕیوە.

لە ڕاگەیەندراوەکەی وەزارەتی دەرەوەی ئەمریکادا هاتووە، کوەیت داواکاریی بۆ کڕینی ئەو کەلوپەلانە پێشکەش کردووە، ئەم گرێبەستەش توانای کوەیت بۆ ڕووبەڕووبوونەوەی هەڕەشەکانی ئێستا و داهاتوو لە ڕێگەی دابینکردنی توانای ئەلیکترۆنی و فیزیکی بۆ تێکشکاندنی فڕۆکەی بێفڕۆکەوان (درۆن) زیاد دەکات.

ئاماژە بەوەش کراوە، داواکاریی کڕینی ئەو سیستمە دژەدرۆنانە لە کاتێکدایە کە هێرشەکانی کۆماری ئیسلامیی ئێران بۆ سەر وڵاتانی عەرەبیی ناوچەکە و لە نێویاندا کوەیت، بەرفراوان بوون.

وەزارەتی دەرەوەی ئەمریکا لە بەشێکی دیکەی بەیاننامەکەدا ڕوونیکردووەتەوە: "ئەم گرێبەستە خزمەت بە ئامانجەکانی سیاسەتی دەرەوە و ئاسایشی نەتەوەیی ویلایەتە یەکگرتووەکان دەکات، چونکە یارمەتیدەرە بۆ بەهێزکردنی ئاسایشی یەکێک لە هاوپەیمانە سەرەکییەکانی ئەمریکا لە دەرەوەی ناتۆ."