فەرەنسا بەنیازە زیندانێکی گەورە لە دەرەوەی وڵاتەکەی و لە دارستانەکانی ئەمازۆن بۆ بازرگانانی ماددەی هۆشبەر و کەسانی توندڕەو دروست بکات،  زیندانە کە 500 کەس لە خۆ دەگرێت و تێچوکەشی 400 ملیۆن دۆلار دەبێت.

هەواڵ:KNNC


بەهۆی زۆری تاوانبارانی ماددەی هۆشبەرەوە، جیرارد دارمانین، وەزیری دادی فەرەنسا ڕایگەیاند، وڵاتەکەی نیازی هەیە زیندانیکی گەورە لە دەرەوەی خاکی خۆی و لە ئەمەریکای باشور بۆ تاوانباران و  بازرگانانی ماددەی هۆشبەر دروست بکات.

زیندانەکە لە ناوچەی گویانای ئەمەریکای باشور دروست دەکرێت، ناوبراو بە میدیاکانی وڵاتەکەی ڕاگەیاندوە  زیندانەکە بۆ "هەمو ئاستەکان" ـی تۆمەتبارانی ماددەی هۆشبەر و تایبەت دەبێت بە تاوانە ڕێکخراوەکان.

وتوشیەتی دروستکردنی ئەو زیندانە 400 ملیۆن دۆلار  تێچوی دەبێت و پێشبینی دەکرێت لە ساڵی 2028 دا تەواو ببێت.

شوێنی زیندانییەکە، لە قوڵایی دارستانەکانی ئەمازۆنە دەبێت،  بڕیاریشە 500 زیندانی لەخۆ بگرێت و دەبێتە یەکێک لە مەترسیدارترین زیندانەکان و زیندانەکانی ناویشی  تاوانبارە مەترسیدارەکان دەبن.

ئەو پلانەی فەرەنسا بۆ کردنەوەی زیندانێک لە ناوجەرگەی دارستانەکانی ئەمازۆندا،  دوای زنجیرەیەک کردەوەی توندوتیژی ڕاگەیەندرا کە پەیوەندییان بە باندە تاوانکارەکانەوە هەیە و   لە چەند مانگی ڕابردودا هێرشیان کردبوە  سەر زیندانەکان و کارمەندەکانی ناو زیندانەکە.