لە هەشتەم ساڵیادی كۆچی دوایی رەوانشاد نەوشیروان مستەفا، لەلایەن ژوری رۆژنامەوانییەوە سیمیناری (پڕۆژەی چاکسازی نەوشیروان مستەفا لە هەرێمی کوردستان: شیکردنەوەی دەستکەوت و شکستەکان) بۆ نوسەر و لێکۆڵەر (د. مەجید ساڵح) بە ئامادەبونی ژمارەیەك لە هەڵسوڕاوانی بزوتنەوەی گۆڕان لە مەكۆی سەرەكی بزوتنەوەکە بەڕێوەچو.

هەواڵ:KNNC

لە سیمینارەكەدا د. مەجید ساڵح تیشكی خستە سەر قۆناغە جیاوازەكانی ژیانی سیاسی و كۆمەڵایەتی و روناكبیری رەوانشاد نەوشیروان مستەفا و ئاماژەی بەوەكرد كە نەوشیروان مستەفا لە هەموو بوارەكانی زمانەوانی و مێژوو سیاسەت قسە و بۆچونی گرنگ و پێویستی بۆ كۆمەڵگە هەبووە، ستراتیژ و پلانی بۆ داهاتوو هەبوە.

وتیشی: بەڵگەنامە مێژوییەكان دەرخەری ئەوەن نەوشیروان مستەفا لە سەختترین كاتەكانی شكستی شۆڕشی كورددا بیری لە هەستانەوەی شۆڕش و نەخشەكێشانی راپەڕین داناوە و ئومێدی سەركەوتنی هەبووە تا بە ئەنجامیشی گەیاند، لە دوای راپەڕینیشەوە پڕۆژەكانی گۆڕان بۆ دەوڵەتداری و خزمەتی خەڵك و كوردستان و ئیسڵاح لە كۆمەڵگەی كوردی.

جەختی كردەوە كە پڕۆژەكانی نەوشیروان مستەفا كۆتایی نەهاتووە، بەڵكو لە هەموو كات زیاتر ئێستا كۆمەڵگەی ئێمە پێویستی بە دنیابینی و پڕۆژەكانی نەوشیروان مستەفا هەیە و بزوتنەوەی گۆڕانیش ئەوەندە خەڵكی بە ئەزموونی هەیە كە دووبارە ئەو پڕۆژانە سەر لەنوێ كاریان لەسەر بكرێتەوە.