دۆناڵد ترەمپ، سەرۆکی ئەمریکا ڕۆژی سێشەممە لە ڕیازی پایتەختی سعودیەوە هەڵوەشاندنەوەی سزاکانی سەر سوریای ڕاگەیاند، ئەم هەنگاوە دوای ڕاوێژکردن بو لەگەڵ محەمەد بن سەلمان، شازادەی جێنشینی سعودیە.

هەواڵ:KNNC

لە وتارەکەیدا ترەمپ ئاماژەی بەوەدا کە ئامانجی بڕیارەکە ئەوەیە "دەرفەتێکی نوێ بە گەلی سوریا" بدرێت و گفتوگۆکان لەسەر ئەو بابەتە ڕاستەوخۆ لەگەڵ سەرکردایەتی سعودیە ئەنجامدراون، کە ڕۆڵێکی سەرەکییان هەبووە لە گەیشتن بەم هەنگاوەدا.


هەڵگرتنی سزاکانی سەر سوریا مانای چییە و بۆچی سەرۆکی ئەمریکا بە "دەرفەتێکی نوێ"ی دەزانێت؟

لیرە و دۆلار
زۆربەی شرۆڤەکاران هاوڕان لەسەر ئەوەی کە ئەم بڕیارە دەتوانێت سەرەتای سەردەمێکی نوێی ئابووری بێت بۆ سوریا کە ساڵانێکە بەهۆی شەڕ و گەمارۆ نێودەوڵەتییەکانەوە بەدەست قوڵبونەوەی قەیرانەکانەوە دەناڵێنێت.

بەگوێرەی چاودێریکردنی بازاڕی دراوی ناوخۆیی، بەهای لیرەی سوری لە بازاڕەکاندا بەرزبونەوەی بەرچاوی بەخۆیەوە بینیوە و بەهاکەی نزیکەی لەسەدا ١٠ بەرزبووەتەوە، بۆ کڕین نزیکەی ٨٣٠٠ لیرەیە و بۆ فرۆشتنیش بە ٨٧٠٠ لیرەوە مامەڵەی پێوەدەکرێت.

بوژانەوەی ئابووری
پێشبینی دەکرێت ئەم بڕیارە ببێتە هۆی گۆڕانکارییەکی ڕیشەیی لە ئابوری سوریادا، بە کردنەوەی بازاڕەکان بەڕووی کەلوپەلی سەرەکی و ئاسانکاری بۆ هاتنە ناوەوەی خۆراک و دەرمان.

هەروەها پێشبینی دەکرێت ئەم بڕیارە ببێتە هۆی بەرزکردنەوەی ئاستی بەرهەمهێنانی ناوخۆیی و بەرزکردنەوەی ئاستی خۆبژێوی سوریا، سەرەڕای ئەو ئاڵنگارییانەی کە لە بەردەم ئابوری سوریادا بەردەوامە.

کاریگەری دۆمینۆ
هەروەها ئەم هەنگاوەی ئەمریکا دەتوانێت "کاریگەری دۆمینۆ"یش دەستپێبکات، بە هەنگاوی هاوشێوەی وڵاتانی ئەوروپا و لایەنە نێودەوڵەتییەکانی دیکە، کەشوهەوایەکی دۆستانەی وەبەرهێنان دروست دەکات.

چونکە ژینگەیەکی سەقامگیری وەبەرهێنان هۆکارێکی سەرەکییە بۆ ڕاکێشانی وەبەرهێنەرانی ناوخۆیی و نێودەوڵەتی بۆ بازاڕی سوریا.

دەرفەتی ئاوەدانکردنەوە
هەڵگرتنی سزاکان دەتوانێت جوڵە بۆ پڕۆژەکانی ئاوەدانکردنەوە بگەڕێنێتەوە، بەتایبەتی ژێرخانی وێرانبوی وەک قوتابخانە و نەخۆشخانە و ڕێگاوبانەکان.

ڕەنگە ئەمە کرانەوەیەک بێت بۆ دەستپێکردنی پڕۆژەی گەورە لە کەرتەکانی وزە و گەشتیاری و کشتوکاڵدا، کە دوای چەندین ساڵ لە وێرانکاری، بناغەیەک بۆ بنیاتنانی ئابوورییەکی نوێ دابنرێت.