نرخی زێڕ دابەزینێکی بەرچاوی تۆمارکردو و ئۆنسەیەک بە 3230 دۆلار مامەڵەی پێوەدەکرێت.

ئابوری:KNNC

ئەمڕۆ سێشەممە، لەگەڵ کردنەوەی بازاڕەکانی ئاسیا نرخی زێڕ زیاتر دابەزی و ئۆنسەیەک بە 3230 دۆلار و 99 سەنت مامەڵەی پێوەدەکرێت.

هاوکات، بەپێی داتاکانی ئاژانسی رۆیتەرز نرخی ئایندەی زێڕی ئەمەریکا بەرێژەی 0.2% بەرزبوەتەوە و بە 3235 دۆلار مامەڵەی پێوەدەکرێت.

رێکەوتنی چین و ئەمەریکا لەسەر هەڵپەساردنی باجی گومرگی نێوانیان، وایکرد نرخی زێڕ بەرێژەی 2.7% دابەزین تۆماربکات.

تیم واتەر، شرۆڤەکاری باڵای بازاڕ لە کۆمپانیای KCM Trade دەڵێت: باشتربونی پەیوەندییە بازرگانییەکانی نێوان دوو گەورەترین ئابوری جیهان وایکردوە بازرگانان رو لە بازاڕەکانی دیکە بکەن کە مەترسی تێدایە و لە بازاڕی زێر دورکەوتونەتەوە بەو شێوەیەش خواست لەسەر زێڕ کەمبوەتەوە.

سەبارەت بە کانزاکانی دیکەش، نرخی یەک ئۆنسە زیو بە ڕێژەی 0.6% بەرزبوەوە و گەیشتە 32.78 دۆلار، پلاتینۆم بە ڕێژەی 0.8% بەرزبوەوە و گەیشتە 982.70 دۆلار و پالادیۆم بە ڕێژەی 0.4% دابەزی و گەیشتە 942.19 دۆلار.