وەزیری دەرەوەی ئێران لە پەیامێکدا ڕایگەیاند: پیتاندنی یۆرانیۆم مافی سروشتی وڵاتەکەیەتی و دەستی لێهەڵناگرن، دەشڵێت: دەتوانن ئەمەریکا دڵنیا بکەنەوەی بۆ ئەوەی چەکی ئەتۆمی بەرهەم ناهێنێن.

هەواڵ:KNNC

لە چوارچێوەی دوایین گۆڕانیکارییەکان سەبارەت بە دانوستانەکانی ئێران و ئەمەریکا، عەباس عێراقچی، وەزیری دەرەوەی ئێران، لە پەیامێکدا کە لە تۆڕی کۆمەڵایەتی ئێکس رایگەیاند: بەرپرسانی ئەمەریکی هەفتانە هەڵوێستەکانیان دەگۆڕن و لێدوانی دژ بەیەک دەدەن، بەپێچەوانەوە هەڵوێستەکانی تاران رون و ئاشکرایە و پێداگرن لەسەر ئەوەی بابەتەکان لەناو دانوستانەکان و بە دور لە میدیاکان بخەنە بەرباس.

جەختیشیلەوەکردەوە، پیتاندنی یۆرانیۆم مافی سروشتی وڵاتەکەیەتی و بە ڕێکەوتن بێت یا خود نا دەستبەرداری ئەم مافە نابێت.

لێدوانەکەی عێراقچی دوای ئەوە هات ستیو ویتکۆڤ نێردەی دۆناڵد ترەمپ بۆ ڕۆژهەڵاتی ناوەڕاست بە میدیای ئەمریکی راگەیاند: واشنتۆن مافی پیتاندنی یۆرانیۆم لە هیچ ئاستێکدا بە ئێران نادات.