وەزارەتی بەرگری تورکیا بڵاویکردووەتەوە، سوپای تورکیا و هێزە مللیەکانی سوریا، دوو گوندیان لە ناوچەکانی رەسولیان و تەل ئەبیەز لە سنوری شاری گرێسپی کۆنترۆڵکردووە، بەڵام وەزارەتی بەرگری سوریا و هێزە کوردییەکان ئەو هەواڵە رەتدەکەنەوە.

وەزارەتی بەرگری تورکیا رایگەیاند، هەردوو گوندی تاباتین و تەل موشرەفیان لە سنوری رەسوڵیان و تەلئەبیەز لە سنوری شاری گرێسپی کۆنتڕۆڵکردووە و هێرشەکە لە چوارقۆڵەوەکراوە.

وەزارەتی بەرگریی تورکیا راشیگەیاندووە ''ئۆپەراسیۆنی کانی ئاشتی، بەدرێژایی شەو لە وشکانی و ئاسمانەوە بەسەرکەوتوویی بەردەوام بوو. ئەو ئامانجانەی دیاری کرابوون کۆنتڕۆڵکران".

لەبەرامبەردا هێزەکانی سوریای دیموکرات رایگەیاند، سەرجەم هێرشەکانی سوپای تورکیا لە ناوچەی سەرێکانی تێكشکێنراون و لە دوێنێوە چوار تانکی تورکیا و پێنج سەربازی ئەو وڵاتەیان کوشتووە و تورکیا هیچ پێشڕەوییەکی نەکردووە.

هاوکات وەزارەتی بەرگری سوریا رایگەیاند، دەنگۆی پێشڕەوەی و کۆنترۆڵکردنی چەند ناوچەیەک لەلایەن تورکیاوە دوورە لە راستییەوە و پێشڕەوییان نەکردووە.


لەلایەکی دیکەوە میدیاکانی تورکیا بڵاویانکردووەتەوە، لە بەیانی ئەمڕۆوە تورکیا سەرجەم بەربەرستە کۆنکرێتییەکانی نێوان رۆژئاوا و باکوری کوردستان داینابوون لابردووە و لە هەردوو ناوچەی سەرێکانیێ و گرێسپی و ئامادەکاری بۆ هێرشی زەمینی دەکرێت.

هاوکات ناوەندی ڕاگەیاندن و چاپەمەنی هەسەدە دەڵێت "لەئەنجامی هێرش و تۆپبارانەکانی تورکیا بۆسەر باکوری ڕۆژهەڵاتی سوریا لە یەکەم رۆژی هێرشەکەدا ٣ شەڕڤانی هەسەدە و پێنج هاوڵاتی سڤیل شەهیدبوون".

ئەمەش لەکاتێکدایە، ئێوارەی دوێنێ چوارشەممە، هێرشی تورکیا بۆسەر خاکی ڕۆژئاوای کوردستان لەلایەن سەرۆککۆماری تورکیاوە ڕاگەیەندرا و سەرەتا بە بۆردوومانکردنی چەند ناوچەیەک دەستیپێکرد، دواتر وه‌زاره‌تی به‌رگریی توركیا ڕایگەیاند، لەگەڵ چەکدارانی هاوکاری سوری ئۆپراسیۆنی زەمینیان دەستپێکردووە و دەچنە ناو خاکی سوریاوە.