قەرزی کارەبای پێش پڕۆژەی "ڕووناکی" بۆ ئەو هاوبەشانەی تاوەکو ئێستا قەرزەکانیان پاکتاو نەکردووە، دەکرێتە قیستی مانگانە. هاوبەشان پێویستە ئەو قیستە لەگەڵ پسوولەی مانگانەی کارەبای ڕووناکی بدەن و ماوەی ئاسایی 50 ڕۆژیش بۆ پارەدانی پسوولەکە جێبەجێ دەکرێت.

بەپێی خشتەی دیاریکراو بۆ جۆری پۆلی هاوبەشەکان، قەرزی ماڵان و کەرتی کشتوکاڵ دەکرێتە 24 قیستی مانگانە و کەمترین بڕی پارەش 20 هەزار دینار دەبێت بۆ هەر مانگێک.  هاوکات بۆ هاوبەشانی بازرگانیی بچووک، ماوەی قیستەکە 12 مانگ دەبێت بە کەمترین بڕی 20 هەزار دینار.

سەبارەت بە هاوبەشانی بازرگانی و پیشەسازیی گەورە، ماوەی دانەوەی قەرزەکە بە 6 مانگ دیاری کراوە و کەمترین بڕی پارەی قیستی مانگانەش 200 هەزار دینارە.