ململانێ پێوستە سەرەتایەک بێت بۆ سپاردنی لەمپەڕەکان بێت بە پلانی مەحکەم و گونجاو و جێبەجێکراو لەپێناو کۆمەڵگە و هاوڵاتی نەک بەجێهێشتنی بۆ کات، هەروەها ڕێگای مامەڵەکردن لەگەڵ ململانێ و ناکۆکی و دۆخی بارگاوی بە گیانی بەریەککەوتن لە نێوان ئەندامی هەر دامەزراوەیەکی ئیداری و کارگێڕی و چاودێری و بەڕێوەبردن لە دو تای تەرازوی پاساندان خۆی دەبینێتەوە:
یەکەم/ دەکرێت ببێتە هەوێنی سەرکەوتن
دوەم/ دەکرێت ببێتە هەوێنی داڕمان

ململانێ دۆخێکی ئاساییە لە بەڕێوەبردن، چونکە لەگەڵ بەردەوام و بەرەو پێشچون ململانێ بە سروشتی لە دایک دەبێت، هەروەها دەبێت بە فریادڕەس کاتێک ڕاشکاوی و رونی سەرچاوەی ململانێ بێت نەک بە پێچەوانەوە سەرکوت کردن و سەرکۆنە کردن و شێواندن و ببێتە کلتوری هەر بیرێک و بیردۆزێکی نوێ بۆ بەرێوەبردن و ئاراستە کردن، بێ ئەوەی وێنە بکرێت بە ئەم ئاراستە و بیرۆکەیە دەبێتە هۆکارێک بۆ قۆرخ کردنی دەسەڵاتەکان.

دروست بونی ململانێ پێوستە لە چوارچێوەی قەزیە بێت نەک لەسەر ئاستی تاک و تاقم، چونکە قەزیە و شەخص تەواو جودان لە یەکتر لە پێناو پاراستنی کەسایەتیەکان لە هەمو تانە و تەشەر و ڕێگری کردن لە دروست کردنی وێنەی نێگەتیف بۆیان، ململانێى پۆزەتیف گونجاوترین ڕێگایە بۆ پێشکەش کردنی بژاردە و  پێشنیار، دورمان دەخاتەوە لە بە نیشانە گرتنی تاک لە کاتی کێشە و پاشکشێ لە کاتی دروستبونی هەر دۆخێکی نە خوازراو، بگرە دەبێتە چارەسەرکردنی هەر هەڵەیەکی بەرێوەبردن لە کەمترین کاتتدا و بێ دروست بونی کاریگەری نێگەتیڤ لەسەر وێنە  گەورەکە، بێ گەڕانەوە بۆ رابردو و هەڵدانەوەى پەڕەکانی ڕابردوو، ململانێ کە لەسەر ئاستی قەزیە بگوازرێتەوە بۆ ئاستی شەخصی؛ لە کۆتادا کاریگەری نەخوازراو دروست دەکات لەسەر کۆی پڕۆسەکە.

دیاردە نەخوازراوەکانی ململانێ:

- دواکەوتن لە راپەڕاندنی کاروبارەکان
ـ دەستنیشان نەکردنی ئامانجەکان
ـ شۆڕ نەکردنەوەی دەسەڵاتەکان
ـ بڕیار نەدان لەسەر چارەسەرکردنی کێشەکان
ـ هەوڵدان بۆ قەتیس کردنی دەسەڵاتەکان
ـ بەیەکداچونی دەسەڵاتەکان
ـ کاڵبونەوەی کاری دەستەجەمعی
ـ هەستیاری لە پەیوەندیەکان لە نێوان یەکتر
ـ  کارکردن لەسەر بابەتە لاوەکیەکان

ئیدارەدانی چەمکی ململانێ لە کۆی پڕۆسەی بەرێوەبردن؛ هێندە سانا نیە، پێوستی بە خوێندنەوەی زۆر ورد هەیە، بۆ هەند وەرگرتنی سەرجەم جومگەکان وەک (ئاڕاستەکان، دنیا بینین و پێشبینەکان و پێشنیارەکان) بۆ دروست کردنی باڵانسی نێوانیان، لە کاتی هەڵکشانی خاڵە ناکۆکان و دروست بونی بارگەی و بەریەک کەوتن و چەق بەستنی پڕۆسەکە لە نێوان کەسەکان و دروست بونی هەستیاری لەسەر هەمو ئاستەکان.

هۆکارە سەرەکیەکانی ململانێ:
ـ جیاوازی لە تەکنیکی بەڕێوەبردن
ـ ئامانج و دنیابینی جیاواز
ـ دڵنیابون لە توانای کەسی بەرامبەر؛ لاواز یا خود بەهێز بێت
ـ  شێوازی بەرژەوەندی جیاواز
ـ قەبارەی سەرچاوەکان وەک (دارایی و مرۆیی) و بەکارهێنایان
ـ پەستانە دەرەکی و ناخۆیەکان لەسەر پڕۆسەی بەڕێوەبردن
ـ دروست کردنی چینایەتی و هەستیاری نێوان تاکەکان

بە نەتیجە هەموو ئەو ململانێیە بۆ سەرخستنە، بۆ خزمەتە، بۆ ئەنجام و ئامانج، بۆ پاراستنە و دورە لە پەرتبون و کەرت بون، هەروەها بۆنی دڵسۆزی لێیەت و پیرۆزە و شکۆمەندە، کارکردن بۆ کۆمەڵگەی دادگەر و شکۆی هاوڵاتی و سیستمی شەفاف و داکۆکی بێت لە لاواز پێش بە هێز، بۆ گەڕاندنەوەی متمانەی نێوان تاکەکان، دورکەوتنەوە لە بە پاڵەوان کردن و تەخوین کردنی بێ بنەما.