تاكە وەلاتێك شك نابەین، بەبێ ئەنجامدانی شۆڕشی زانستی و پەروەردەیی، لە هیچ بوارێكدا (سیاسیی، جڤاكیی، ئابووریی...) هەنگاوێك چووبێتە پێشەوە. ئەزموونی وەلاتانی پێشكەوتوو، پێمان دەلێت: هیچ پێشكەوتنێك لە هیچ بوارێكدا، بەبێ پێشخستنی پەروەردە، بەدی نایەت. پێوەندیی پەروەردە بە پێشكەوتنی هەر وەلاتێكەوە، پێوەندییەكی ڕاستەوخۆیە. بەبێ هەبوونی پەروەردەیەكی سەردەمیانە، باسكردن لە پێشكەوتنی وەلات، حیكایەتی بەر ئاگردانە و وەك ئەوە وایە، ئاسنی سارد بكوتین!


ئامانج لە پەروەردە، بریتییە لە پێگەیاندنی تاكێكی ئازاد، داهێنەر، خۆپەسەند، مرۆڤدۆست، ژینگەپارێز، تاكێك كە ئینتیمای بۆ خاك و نەتەوەكەی هەبێت و دلسۆز بێت لە كارەكەیدا و خۆی بە بەرپرسیار بزانێت بەرانبەر كۆمەلگە و ئایندەی وەلاتەكەی، ئاشكرایە كە پەروەردەی ئێمە لە بارودۆخێكی وەهادا نییە، لە گەیشتن بەم ئامانجانە نزیكیشمان بكاتەوە، چ جای ئەوەی بیانهێنێتەدی. غیابی پەروەردەیەكی دروست، بۆ ماوەیەكی دوورودرێژ، مرۆڤی كوردی كردووەتە كائینێكی نەخۆش، نەخۆش لە هەموو ڕوویەكەوە (جەستەیی، هزریی، دەروونی...) ئەركی دمەزراوەی پەروەردە، بە پلەی یەك ڕاستكردنەوە و سەر لە نوێ بونیادنانەوەی كەسایەتی مرۆڤی كوردە!


ئامانجی پەروەردە پێگەیاندنی مرۆڤێكە، كە بۆ هێنانەدی ئامانجێكی بالاتر لە بڕوانامە و بژێوی، كۆشش بكات. ڕاستە ڕێژەی ئەوانەی دەزانن بنووسن و بخوێننەوە، بەراورد بە ڕابردوو ڕوو لە هەلكشانە، بەلام خۆ خوێندەواری بەتەنها هەر نووسین و خوێندنەوە نییە. ئەدی ئەوە نییە مرۆڤە نەخوێندەوارەكەی جاران هەم دونیابینییەكەی جوانتر و هەم چێژیشی سەلامەتتر بوو، هەم دەروونی ساغلەمتر و هەم ناخیشی خاوێنتر بوو! هەمووان سەرنجیان تەنها لەسەر ژمارە و چەندێتییە، شانازیی دەكەین كە زۆرترین زانكۆ و خاوەن بڕوانامەمان هەیە، بەلام ناپرسین ئەم هەموو بڕوانامەیە چییان لە مرۆڤی ئێمە و لە كۆمەلگای ئێمە گۆڕی؟ ناپرسین بۆچی كۆمەلگای ئێمە لە جاران داخراوتر و گەنج و لاوی ئێستای كورد، بەراورد بە نەوەكانی پێش خۆیان، لە دواوەترە؟ ناپرسین بۆچی ئەم نەوەیە خاوەنی هیچ دۆزێك نییە و بۆچی هیچ شتێك بەلایەوە پرس نییە و بۆچی ئەوەندە توندئاژۆ و سەرگەردانە لەڕووی هزرییەوە؟ 


بەبێ سودوەرگرتن لە ئەزموونی ئەو وەلاتانەی لە كەرتی پەروەردەدا هەنگاوی گەورەیان ناوە، ئەستەمە بتوانین گۆڕانكاریی بكەین، بەلام سودوەرگرتن شتێكە و كۆپیكردنی سیستمی پەروەردەی وەلاتانی تر (بەبێ ڕەچاوكردنی تایبەتمەندییەكانی كۆمەلی كوردەواری) شتێكی ترە، نە پاراستنی ڕەسەنایەتی، ئەوەیە: دەرگا لەسەر خۆمان دابخەین و سود لە كولتور، فەلسەفە، سیستم، زانست و بەها بەرزەكانی مرۆڤایەتی وەرنەگرین، نە مۆدێرنبوونیش ئەوەیە: پشت بكەینە ڕەسەنایەتی خۆمان و بەها بەرزەكانی كوردەواری پشتگوێ بخەین، پەروەردەی ئیمە دەبێت ڕەنگدانەوەی هەردووكی بێت، واتا دەبێت هاوسەنگ بێت (مۆدێرن و ڕەسەن!) وەك ئەوەی ژاپۆن.


ئەركی دەسەلاتە لە ڕێی دامودەزگا پەروەردەیییەكانەوە، تاكی كورد بە جۆرێك پەروەردە و ئاڕاستە بكات، كە ئینتیمای بۆ نەتەوە و نیشتمان لە سەرووی هەموو ئینتیمایەكەوە بێت، وا بكات خێل و خێزان، ئال و ئۆل بەتەواوی لە خزمەتی پرسی نەتەوەییدا بن، ئەركی دەسەلاتە بە ئاڕاستەی به‌دیهێنانی هەستی نەتەوایەتی هاوبەش هەنگاو بنێت، بە یاساش هەموو ئەو لایەنانە سنوردار بكات، كە بانگەشەی پێچەوانەی ئەمە دەكەن و دەخالەتی هەموو ئەوانەش بە توندی ڕەت بكاتەوە، كە لێبڕاوانە كار بۆ جێكردنەوەی ئایدۆلۆژیای خۆیان لە نێو پەروەردەدا، دەكەن.


ئەرك و ئامانجی پەروەردە لە نێو ئەو گەلانەی، كە خاوەنی كییانی خۆیانن، ئەو وەلاتانەی لە ڕووی ئابوورییەوە جێگیر و لە ڕووی كۆمەلایەتییەوە سەقامگیرن، جیایە لە ئەركی پەروەردە لە نێو گەلیكی بندەستەی وەك ئێمەدا، كە هێشتا لە قۆناغی ڕزگاریی نیشتمانیی داین، ئامانجی ئێمە لە پەروەردە، لەپال ئەرك و وەزیفەكانی دیكەیدا، هێنانەدی ئامانجە نەتەوەییەكانیشە، بە واتایەكی تر، هێنانەدی هاوئاهەنگییە لە نێوان ئامانجە پەروەردەیی و ئامانجە سیاسیی و نەتەوەییەكاندا، بە تایبەت لەمڕۆدا كە چیتر مەسەلەی شوناس و پڕەنسیپە نەتەوەییەكان، لە ڕیزبەندی یەكەمی بابەتە بایەخدارەكانی تاكی كورد نین.