ئەی نیشتمانی بێ گوێچکەم تۆ ئەتەوێت هەرچیەک بیت و هەرچۆنێک بیت هەر خۆشم بوێت؟

(شێرکۆ بێکەس)

 

نزیکەی شەش ساڵە بەردەوام دانیشتوانی هەرێم توشی چەندەها بەرزو نزمی و برسێتی و نەهامەتی و قڕی بۆتەوە، لە ئەنجامی ناجێگیری لە دۆخی بودجە و موچە و ناسەقامگیری باری دارایی ، سەرەڕای سەرجەم پڕوکانی (دارایی و سیاسی و کەلتوری و کۆمەڵایەتی)، هاوڵاتی و هاوکوردستانیان دڵسۆزانە و بوێرانە بەردەوام بون لە بەخشین، خزمەت، پاراستن، هیوابەخشینەوە بۆ پەک نەخستنی سەرجەم بڕگە و جومگەکانی حکومڕانی لە ئەنجامدا بۆتە کەرت و پەرت بونی سەرجەم کایە و چینەکانەی کۆمەڵگە:

 

* چەندەها مناڵ شەویان ڕۆژ کردەوە بە گریان بۆ شیر.

 

* چەندەها دایک بە فرمێسکی شەرم کاتیان بە ڕێ کرد.

 

* چەندەها باوک کەرامەت و باوکایەتی شکا.

 

* چەندەها گەنج چیرۆکی خۆشەویستی و خەونی بە تەنها هێلانەیەکی ئارام و ژیانێکی سەربەرزانەی لە گۆڕنا.

 

* چەندەها مناڵی لە سۆزی باوان ئامێزی خێزانی دور خستەوە.

 

* چەندەها پیر و بە ساڵاچوانی ڕۆحیان بریندار بو لە برسێتی و بێ دەرمانی و بێ نەوایدا.

 

بەرێزان دەسەڵاتدارانی حکومی و ئەمنی و سەربازی سەرجەم دام و دەزگاکانی ئیدارەی سلێمانی، چەند پرسیارێکی جدی و مەوزوعیم هەیە.

 

١. ئایا خۆپیشاندەران کام دام و دەزگای حکومیان سوتاند؟

 

٢. هەڵیان کوتایە سەر چ مومتەلەکاتی حیزبی؟

 

٣. پەلاماری چ کۆمپانیا و بانکی ئەهلیان دا؟

 

٤. دژی چ بەهایەکی نیشتمانی و مرۆفایەتی بوون؟

 

٥. بە نیازی چ جۆرە کودەتایەک دژی نیشتمان لەسەر شەقام بون؟

 

٦.خۆ پیشاندەران ژمارە و دەستی چ هاوکێشەیەکی تێکدەرانەن؟ تەنها تاوانی ئەم چینەی سەر شەقام، داوای نان و ئەمان و کەرامەت ئەکەن، داوا ئەکەن سەربەرز بژین، داوا ئەکەن بەستەری کۆمەڵایەتی و ئەخلاقی لەوە زیاتر نەپچڕێت، داوا ئەکەن ژیان بەردەوام بێت، داوای گەورە و تەعجیزیان نیە، تەنها داوای ژیان ئەکەن، کەسیان ململانێی کورسی دەسەڵات ناکەن، تاکە خەونیان (نان و نان ئینجا نان).

408 جار خوێندراوەتەوە