حوکمڕانی ئەم هەرێمە، نمونەی ئەو هەڵۆیەیە کە لەگەڵ هەڵکشانی تەمەنی توانای فڕین و زامن کردنی ژیانی کەم دەبێتەوە، بۆیە بە ناچاری قۆناغ بە قۆناغ پەڕی جەستەی لێ دەکاتەوە بۆیە تەمەنی درێژ بیت بە لاوازی.


حکومڕانی پیر و بە ساڵاچو، حکومەتی هەرێم یەکێک لە کێشە و ئاریشە هەست پێ نەکراوەکانی بریتیە لە دیاردەی پیربون و هەڵکشانی تەمەنی فەرمانبەران و موچە خۆرەکان لە وەزارەت و دەستە و بەڕێوەبەرایەتیە مەدەنییەکانە، بە شێوەیەکی گشتی کەمترین تەمەنی کارمەندی فەرمی حکومەت تەمەنی (32) ساڵە.


لە ژێر سایە و سێبەر و دروشمی ئابوری سەربەخۆ، پشت بەستن بە خوتکەدانی هزری وەهمی نیشتمانپەروەری هاوڵاتیان، بە سپۆنسەری عینادی شەخصی و تەقسیماتی ئیقلیمی، حکومەتی هەرێم زیاتر لە (10) ساڵی پڕ قەیرانی بەڕێکرد، زیاتر لە (10) ساڵ دامەزراندنی مەدەنی بە شێوەکی گشتی وەستاوە، واتە سەرجەم فەرمانگەکانی هەرێم تەمەنی سەرجەم فەرمانبەران و موچەخۆران لە هەڵکشاندایە، بێ ئەوەی توانا و وزەی گەنجی تێکەڵ بێت بۆ تازەبونەوە و چالاک بونی کەرتیی گشتی، ئەمەش موئەشرێکی ترسناکە بۆ دواکەوتن و سست بونی جومگەکانی حکومڕانی.


هاوشان لەگەڵ پوکانەوەی کەرتی گشتی مەدەنی دو ترسی تر دێتە کایەوە:

1-بەهێز بونی کەرتی تایبەتی قۆرخکار، وەک دەسەڵاتی خنکێنەر دەبێتە حکومڕانی سێبەر، کە دەبێتە جێگرەوەی حکومڕانی راستەقینەی نیشتمانی، بۆ سەرجەم کایەکانی پیشەسازی، وزە،بازرگانی، ئەمنی، وەبەرهێنان، پەروەردەیی..هتد.

2-زیاد بون و قەبە بونی، هێزی سەربازی و ئەمنی و هەواڵگری بە تازە بونەوەی بەردەوام، دروست بونی نیشتمانی ئاگر و ئاسن، هەڵتۆقینی فەرماندە و لەشکر و سریە و فەوج… هتد، ئەمە نە دیموکراتیە نە سۆسیال دیموکرات نە نیشتمانیە نە کوردستانی.

لە دیارترین سیماکانی حکومڕانی سەردەم بریتیە لە:
1- زیاد بونی ڕێژەی برسێتی و هەژاری بۆ (12%).
2- زیاد بونی ڕێژەی بێکاری بۆ (16%).
3-زیاد بونی ڕسومات و ضەریبە هەتا نزیک (300%).
4- زیادبونی سپی کردنەوەی پارە و قاچاخچێتی و سەرانە.
5- زیاد بون و زیندو بونەوە سیستەمی خێل و عەشرەت.
6- دابەزینی ئاستی سەرجەم خزمەتگوزارییە نیشتمانیەکان.
7- دابەزینی ئاستی متمانەی هاوڵاتیان و بەها نیشتمانیەکان.
8- وەستانی سەرجەم پێشینەکان بۆ هەمو چین وتوێژەکان.
9- دابەشبونی زیاتری دو ئیدارەیی کە بۆتە دابەشبونی سەربازی و پەیوەندیەکان.
10- دروست بونی نەوەیەکی بێ ئێستا و داهاتوی بێ هیوا و ڕوشکاو.