بەڕێوەبەرایەتیی
گشتیی کەشناسیی هەرێمی کوردستان پێشبینیی کردووە ئەمشەو نزمەپاڵەپەستۆیەکی لاواز
ڕوو لە ناوچە سنووری و شاخاوییە بەرزەکان بکات و نمەبارانی پچڕپچڕ ببارێت، هاوکات
سبەینێ دووشەممە پلەکانی گەرما کەمێک بەرز دەبنەوە.
بەپێی ڕاپۆرتی
کەشناسی بۆ ئەمڕۆ یەکشەممە (22ی تشرینی دووەمی 2026)، ئاسمان ساماڵ و پەڵەهەور
دەبێت و لە دوای نیوەڕۆوە بۆ نیمچەهەور دەگۆڕێت. کاریگەریی نزمەپاڵەپەستۆ لاوازەکە
تا درەنگانی شەو ناوچە شاخاوییەکانی پارێزگای دهۆک، ئیدارەی سەربەخۆی زاخۆ و بەشێک
لە ناوچە شاخاوییەکانی ئیدارەی سەربەخۆی سۆران دەگرێتەوە و بەرەبەیانی سبەینێ
کۆتایی دێت.
ئەمڕۆ خێرایی
با لەسەرخۆ دەبێت و بە خێرایی 5 تا 10 کیلۆمەتر لە کاتژمێرێکدا بە ئاراستەی
باکووری ڕۆژهەڵات هەڵدەکات و مەودای بینینیش لە نێوان 8 تا 10 کیلۆمەتردا دەبێت.
پلەکانی گەرما نزیک دەبنەوە لە دوێنێ؛ بە شێوەیەک لە گەرمیان 25 پلە، هەولێر،
هەڵەبجە، چەمچەماڵ و زاخۆ 23 پلە، دهۆک و ئاکرێ 22 پلە، سلێمانی 21 پلە، پیرمام 20
پلە و حاجی ئۆمەران 15 پلەی سیلیزی دەبێت.
سەبارەت بە
کەشوهەوای سبەینێ دووشەممە (23ی تشرینی دووەمی 2026)، کەشناسی پێشبینیی کردووە
ئاسمان ساماڵ و پەڵەهەور بێت و هەندێک کات بۆ نیمچەهەور بگۆڕێت، بە هەمان خێرایی
با (5 تا 10 کیلۆمەتر لە کاتژمێرێکدا) و مەودای بینینی (8 تا 10 کیلۆمەتر).
بەرزترین
پلەکانی گەرمای پێشبینیکراو بۆ سبەینێ کەمێک بەرز دەبنەوە؛ لە گەرمیان دەگاتە 26
پلە، هەولێر، هەڵەبجە، چەمچەماڵ و ئاکرێ 24 پلە، دهۆک و زاخۆ 23 پلە، سلێمانی 22
پلە، پیرمام 21 پلە و حاجی ئۆمەران 15 پلەی سیلیزی دەبێت. کەشناسی ئاماژەی بەوەش
کردووە، لە ماوەی 24 کاتژمێری ڕابردوودا لە وێستگەکانی سنووری پارێزگای دهۆک، لە
هەریەک لە دێرەلووک و بامەڕنێ بڕی 2 ملیمەتر باران باریوە.
49 جار خوێندراوەتەوە