نێچیرڤان بارزانی، سەرۆکی هەرێمی کوردستان لە شاری ئەنتاڵیای تورکیا لەگەڵ مەسعود پزیشکیان، سەرۆککۆماری ئێران کۆبووەوە و پەیوەندییەکانی نێوان هەولێر، بەغدا و تارانیان تاوتوێ کرد.

لە پەیامێکدا لە هەژماری فەرمیی خۆی لە تۆڕی کۆمەڵایەتیی (ئێکس)، سەرۆکی هەرێم کۆبوونەوەکەی بە "بەرهەمدار" وەسفکردووە و ڕایگەیاندووە، بیروڕایان سەبارەت بە دۆخی پەیوەندییە دووقۆڵییەکان ئاڵوگۆڕ کردووە.

نێچیرڤان بارزانی ئاماژەی بەوەشکردووە، لە کۆبوونەوەکەدا جەختیان لە بەردەوامیی هەماهەنگی و هەوڵە هاوبەشەکان کردووەتەوە بۆ ڕووبەڕووبوونەوەی ئەو ئاڵنگارییانەی ڕووبەڕووی ناوچەکە بوونەتەوە.

لە بەشێکی دیکەی پەیامەکەیدا هاتووە، هەردوو سەرۆک پێداگرییان لەوە کردووە کە دیالۆگ، لێکگەیشتنی هاوبەش و هاریکاری، باشترین ڕێگەن بۆ گەیشتن بە ئاشتی و سەقامگیریی بەردەوام.