سەرۆکوەزیرانی عێراق بڕیاری دا بە هەڵوەشاندنەوەی سەرجەم گرێبەستە سەربازییەکان لەگەڵ کۆمپانیا نێوەندگیرەکان، و ئاڕاستەکردنی مامەڵەکان تەنها بۆ کۆمپانیا سەرەکییەکانی بەرهەمهێنەر لەڕێگەی دەستەی پیشەسازیی سەربازییەوە.

عەلی زەیدی، سەرۆکوەزیران و فەرماندەی گشتیی هێزە چەکدارەکانی عێراق، لەمیانی سەردانێکیدا بۆ دەستەی پیشەسازیی سەربازی جەختی کردەوە؛ مامەڵەکردن لەگەڵ کۆمپانیا نێوەندگیرەکان بەتەواوی قەدەغەیە، ئەمەش بۆ زامنکردنی شەفافییەت و نەهێشتنی گەندەڵی لە پرۆسەی پڕچەککردنی سوپادا.

لە کۆبوونەوەیەکدا لەگەڵ بەرپرسانی دەستەکە، زەیدی ڕایگەیاند؛ عێراق خاوەنی توانای ناوخۆییە بۆ دروستکردنی چەک و پێداویستییە سەربازییەکان، و داوای فراوانکردنی بەشداریی کەرتی تایبەت و کۆمپانیا پسپۆڕەکانی ئەو بوارەی کرد. هەروەها جەختی لە پێویستیی هەماهەنگی لە نێوان دەستەی پیشەسازیی سەربازی و وەزارەتەکانی بەرگری، ناوخۆ و دەستەی حەشدی شەعبی کردەوە بۆ دیاریکردنی پێداویستییە ڕاستەقینەکانیان.

لە کۆتایی سەردانەکەشدا، سەرۆکوەزیران بەسەرکردنەوەیەکی مەیدانیی بۆ پێشانگەی دەستەکە ئەنجامدا و چەکە دروستکراوە ناوخۆییەکانی وەک درۆن، چەکی جۆراوجۆر، ئامێری چاودێری و ئۆتۆمبێلە زرێپۆشەکانی بینی، و بەڵێنی دابینکردنی سەرجەم پێداویستییەکانی دا بۆ بەهێزکردنی توانای بەرهەمهێنانی ناوخۆیی.