وەزارەتی بازرگانیی عێراق ڕایگەیاند؛ لە ڕۆژی یەکشەممەی داهاتوو (1ی تشرینی دووەم)ـەوە دەست بە دابەشکردنی بەشەخۆراکی حەوتەم و سەبەتەی خۆراکیی چاودێریی کۆمەڵایەتی لە بەغدا و سەرجەم پارێزگاکانی دیکە دەکرێت.

لوما هاشم موسەوی، بەڕێوەبەری گشتیی کۆمپانیای بازرگانیی خۆراک ئاماژەی بەوە کرد، بەپێی ڕێنماییەکانی وەزیری بازرگانی، پرۆسەکە بەپێی پلانێکی پێشوەختە بەڕێوەدەچێت و لە پێناو گەیشتنی خۆراک بە هاووڵاتییان، سەرەتا ئەولەوییەت بە ناوچە هەژارنشینەکان دەدرێت و دواتر بەپێی خشتە ناوچەکانی دیکە دەگرێتەوە.

هاوکات کۆمپانیاکە داوا لە هاووڵاتییان دەکات، سەردانی بریکارەکانی خۆراک بکەن بۆ ئەوەی لە یەک کاتدا هەردوو بەشەخۆراکی مانگانە و سەبەتەی چاودێریی کۆمەڵایەتی وەربگرن، جەختیش دەکاتەوە لە بەردەوامیی دابینکردنی خۆراک بۆ سەرجەم سوودمەندان بێ گرفت.