بەڕێوەبەرایەتیی گشتیی کەشناسی و بوومەلەرزەزانیی هەرێم، پێشبینییەکانی کەشوهەوای بۆ 48 کاتژمێری داهاتوو بڵاوکردەوە و ڕایگەیاند، ئەمڕۆ لە باشووری ئیدارەی گەرمیان، بەشێک لە سلێمانی و باشووری کەرکووک نمەباران دەبێت. لە ئێوارە و شەویشدا ئەگەری بارانبارین لە سنووری ئیدارەی سۆران، ناوچە شاخاوییەکان، پارێزگای دهۆک و ئیدارەی زاخۆ هەیە، پلەکانی گەرماش یەک بۆ دوو پلە بەرز دەبنەوە.

بۆ سبەینێ پێنجشەممەش، کەشناسی پێشبینی دەکات کاریگەریی نزمە پاڵەپەستۆی دەریای ناوەڕاست کەمێک زیاد بکات و بەگشتی ئاسمان هەوری تەواو بێت، لەگەڵ نمەبارانی پچڕپچڕ. لە دوای نیوەڕۆوە ڕێژەی بارانبارین زیاد دەکات و هەورە تریشقەشی لەگەڵدا دەبێت.

بەپێی پێشبینییەکان، بارانبارین لە سنووری پارێزگای هەڵەبجە، دهۆک، ئیدارەی زاخۆ و سۆران بەراورد بە ناوچەکانی دیکە زیاتر دەبێت و لە کاتەکانی شەودا کاریگەرییەکەی لاواز دەبێت. هاوکات سبەینێ پلەکانی گەرما دوو بۆ سێ پلە، و لە ناوچە شاخاوییەکانیش سێ بۆ چوار پلە نزم دەبنەوە.