بانکی بازرگانیی عێراقی (TBI) هۆشداریی توند دەداتە ئەو مووچەخۆرانەی هەرێمی کوردستان کە بەشدارن لە پڕۆژەی (هەژماری من)، تاوەکو ئاگاداری ئەو هەوڵە ساختەکارییانە بن کە ئامانج لێیان دزین و بردنی مووچەکانیانە.

بانکەکە ئاشکرایکردووە، چەندین پەیج و ئەکاونتی ساختە بە ناوی بانکەکەوە لە ڕێگەی واتسئاپەوە پەیوەندی بە هاووڵاتییانەوە دەکەن و بە بیانووی چالاککردنی کارت یان پێدانی دۆلاری گەشتیاری، داوای وێنەی کارتی بانکی و زانیارییە کەسییەکان دەکەن. لە ئێستاشدا بەشێک لە مووچەخۆران، بەتایبەت خانەنشینان، بوونەتە قوربانی و لەم ڕێگەیەوە پارەکانیان براوە.

بۆ پاراستنی هەژمارەکان، (TBI) داوا لە سەرجەم مووچەخۆران دەکات بە هیچ شێوەیەک وێنەی کارتەکانیان و زانیاریی کەسیی بۆ هیچ لایەنێک نەنێرن، جەختیش دەکاتەوە کە بانک هەرگیز داوای کۆدی (OTP) یان ژمارەی نهێنیی کارت لە بەشداربووان ناکات و هیچ پەیوەندییەکیان بەو پەیجە ساختانەوە نییە.