ڕۆژی چوارشەممە (12ی ئابی 2026)، دیاردەی خۆرگیرانی تەواو ڕوودەدات و لە چەند وڵاتێکی جیهان بە ڕێژەی سەداسەد ببینرێت، هاوکات ساڵی داهاتووش دیاردەیەکی دیکەی خۆرگیران عێراق و هەرێمی کوردستان دەگرێتەوە.

ئاراس جەبار، شارەزای کەشناسی ڕایگەیاند: دیاردەی خۆرگیرانی تەواو لە وڵاتانی گرینلاند، ئایسلەندا و ئیسپانیا بە ڕێژەی 100٪ ڕوودەدات و لە ناوچەکانی ڕۆژئاوای ئەوروپا و باکووری ڕۆژئاوای ئەفریقاش بە شێوەی نیمچەیی دەبینرێت. ئاماژەی بەوەش کرد، ماوەی خایاندنی خۆرگیرانە تەواوەکە دوو خولەک و 18 چرکە دەبێت.

سەبارەت بە دیاردەکانی داهاتووش، ئەو شارەزایەی کەشناسی ئاشکرای کرد، خۆرگیرانی داهاتوو لە (2ی ئابی 2027) ڕوودەدات، کە بە شێوەی تەواو لە وڵاتانی سعودیە و باکووری ئەفریقا دەبینرێت، هەروەها بە شێوەی نیمچەیی لە عێراق و هەرێمی کوردستان دەردەکەوێت.