سەرۆکی حکومەتی هەرێمی کوردستان هۆشداری لە مەترسییەکانی کشانەوەی هێزەکانی ئەمریکا و هاوپەیمانان دەدات و ئەو هەنگاوە لەم کاتەدا بە کارێکی "شەرمەزارکەر" ناودەبات کە هەمان هەڵەی ساڵی 2011ـی سەرهەڵدانی داعش دووبارە دەکاتەوە، هاوکات بەغدا بەوە تۆمەتبار دەکات کە ڕێگری لە کڕینی سیستەمی بەرگریی ئاسمانی دەکات و بەئەنقەست هەرێم لەبەردەم هێرشەکاندا لاواز دەکات.

لە چاوپێکەوتنێکدا لەگەڵ ڕۆژنامەی (فینانشیاڵ تایمز)، مەسرور بارزانی سەبارەت بە هێرشی درۆن و موشەکەکان ڕایگەیاندووە، هەرێمی کوردستان هیچ سیستەمێکی بەرگریی ئاسمانیی نییە و ناتوانێت بیانکڕێت، چونکە دەبێت لە ڕێگەی حکومەتی فیدراڵییەوە لە بەغدا بکڕدرێن. دەشڵێت: "کاتێک ڕێگریمان لێ دەکرێت لە کڕینی چەکی پێویست بۆ بەرپەرچدانەوەی ئەو موشەک و درۆنانە، بێگومان بەئەنقەست دەکرێینە ئامانج و لاواز دەکرێین".

سەرۆکی حکومەت کشانەوەی هێزەکانی ئەمریکای لە عێراق بە کارێکی "شەرمەزارکەر" ناوبردووە، چونکە پێی وایە بڕیارەکە لە کاتێکی زۆر ناسک و پڕ لە پشێوی و دڵەڕاوکێی ئەمنیی ناوچەکەدا دێت. ئاماژەی بەوەش کردووە، ناجێگیریی دۆخەکە و ڕەتکردنەوەی چەکدانان لەلایەن میلیشیا شیعەکانی نزیک لە ئێرانەوە، مەترسی لەسەر قەوارەی هەرێم و سیستەمی فیدراڵیی عێراق دروست دەکات. جەختیشی کردووەتەوە، تاوەکو ململانێی ئەمریکا و ئێران بەردەوام بێت، هەرێم لەژێر هەڕەشەدا دەبێت، بەڵام لەگەڵ ئەوەشدا ڕایگەیاندووە: "ئێمە هاوپەیمانی ئەمریکاین و شانازی بەو هاوپەیمانێتییەوە دەکەین".

لە کاتێکدا بەهۆی هێرشی میلیشیاکانەوە ئەمریکا کارمەندە ناپێویستەکانی لە کونسوڵخانە نوێیەکەی لە هەولێر کشاندووەتەوە و وەزارەتی دەرەوەی ئەو وڵاتەش دەڵێت لەگەڵ ئاساییبوونەوەی دۆخی ئەمنیدا دەگەڕێنەوە، تۆبی دۆدج، شارەزای کاروباری عێراق لە زانکۆی ئابووریی لەندەن پێی وایە، کەمبوونەوەی هێزەکانی ئەمریکا بژاردەیەکی کەم لەبەردەم بارزانی جێدەهێڵێت و ناچاری دەکات خۆی لەگەڵ ئێران ڕێکبکەوێت.

سەبارەت بە پاساوەکانی ئێران بۆ هێرشکردنە سەر هەرێم بە بیانووی بوونی هێزە ئۆپۆزسیۆنەکانی ڕۆژهەڵات و پشتیوانیکردنیان لەلایەن ئەمریکا و ئیسرائیلەوە، مەسرور بارزانی ئەو تۆمەتانە بە "زیادەڕەوی" ناودەبات و دەڵێت: "لە گفتوگۆکانمان لەگەڵ ئێران زۆر ڕوون بووین کە ئێمە مەترسی نین بۆ سەر ئەوان، بەڵام ئەوان هەمیشە باسی بوونی هێزەکانی هاوپەیمانان و هێزە ئۆپۆزسیۆنەکانی ئێران دەکەن لە هەرێم".

لە بەشێکی دیکەی ڕاپۆرتەکەدا باس لە تێکچوونی پەیوەندییەکانی هەولێر و بەغدا کراوە لە دوای ڕیفراندۆمەکەی ساڵی 2017 و لەدەستدانی کەرکوک، لەگەڵ پشتبەستنی تەواوەتیی هەرێم بە بەشە بودجەی بەغدا. لەسەر ئاستی ناوخۆش، ئاماژە بە چەقبەستوویی پێکهێنانی حکومەت دراوە بەهۆی ململانێ و بێمتمانەیی نێوان هەردوو پارتە سەرەکییەکەی کوردستانەوە.

لە کۆتاییدا بارزانی هۆشداری دەدات ئەگەر دۆخی ئەمنی تێکبچێت، کۆمەڵگەی نێودەوڵەتی ناچار دەبێت بگەڕێتەوە بۆ سەقامگیرکردنی ناوچەکە، وتیشی: "بەڵام ئەوان دەتوانن ئێستا ئەوە بکەن، بەبێ ئەوەی چاوەڕێ بکەن دۆخەکە خراپتر بێت".