سومیە غانم جبوری، پەرلەمانتاری پارێزگای نەینەوا، هۆشداری دەداتە پارێزگاری شارەکە لە مەترسیی ژێرئاوکەوتنی دوو گوند بەهۆی دزەکردنی ئاو لە بەنداوی موسڵەوە، و داوای دەستێوەردانی بەپەلە دەکات بۆ پاراستنی گیانی هاوڵاتییان و چارەسەرکردنی کێشەکە.

بەپێی نووسراوێکی فەرمی کە ئاراستەی پارێزگاری نەینەوا کراوە و وێنەیەکی بەردەستە، ئەو پەرلەمانتارە ئاشکرای کردووە، بەهۆی دزەکردنی ئاو لە بەنداوی موسڵەوە، ئاستی ئاو بەردەوام لە بەرزبوونەوەدایە، ئەمەش بووەتە هۆی پچڕانی ڕێگای سەرەکیی نێوان هەردوو گوندی (مەحویراتی باکوور و باشوور).

لە نووسراوەکەدا هاتووە، بەرزبوونەوەی ئاستی ئاوەکە ترس و دڵەڕاوکێی لای دانیشتووانی ئەو دوو گوندە دروست کردووە، بەتایبەتی کە وەرزی نوێی خوێندن نزیک بووەتەوە و ترس لەسەر سەلامەتیی منداڵان هەیە، هاوکات هۆشداری دراوە لە مەترسیی نوقمبوونی ئاژەڵ و لەناوچوونی ماڵ و سامانی هاوڵاتییان.

لە کۆتایی نووسراوەکەیدا، سومیە غانم جبوری داوا لە لایەنە پەیوەندیدارەکان دەکات بەپەلە تیمەکانیان ڕەوانەی ناوچەکە بکەن و ڕێوشوێنی پێویست بگرنەبەر بۆ کۆنتڕۆڵکردنی مەترسییەکە و چارەسەرکردنی هۆکارەکانی دزەکردنی ئاوەکە، بۆ ئەوەی ڕێگری لە کارەساتێک بکرێت.