مەزهەر محەمەد ساڵح، ڕاوێژکاری سەرۆک وەزیرانی عێراق ڕایدەگەیەنێت، پرۆژەی دراوی "دیناری دیجیتاڵی" پڕۆژەیەکی ستراتیژیی ئومێدبەخشە و چارەسەرێکی سەربەخۆ نییە بۆ قەیرانی نەختینە، ئاماژە بەوەش دەکات کە دابەشکردنی مووچە بەشێوەی دیجیتاڵی خێرایی مامەڵە داراییەکان زیاد دەکات و مامەڵەی نەختینەیی (کاش) کەمدەکاتەوە.

لە لێدوانێکی ڕۆژنامەوانیدا، مەزهەر محەمەد ساڵح ڕایگەیاند: پێشنیازی خستنەبازاڕی دیناری دیجیتاڵیی عێراقی یەکێکە لەو بیرۆکانەی شایەنی لێکۆڵینەوەیە لە چوارچێوەی هەنگاوەکانی عێراق بۆ وەرچەرخانی دیجیتاڵی و پەرەپێدانی سیستەمی دارایی. ڕوونیشیکردەوە کە دیناری دیجیتاڵی بە واتای دروستکردنی دراوێکی نوێ نایەت، بەڵکو دراوێکی دیجیتاڵییە کە بانکی ناوەندی دەری دەکات و هەمان هێزی یاسایی دیناری کاغەزی دەبێت و بەهاکەی یەکسانە پێی، کە دەکرێت لە ڕێگەی جزدانە دیجیتاڵییەکان و هەژمارە بانکییەکانەوە مامەڵەی پێوە بکرێت.

سەبارەت بە گرنگیی پرۆژەکە، ڕاوێژکارەکەی سەرۆک وەزیران ئاماژەی بەوە کرد، دراوی دیجیتاڵی پشت بەستن بە پارەی کاش کەمدەکاتەوە، تێچووی چاپکردن، گواستنەوە و پاراستن دادەبەزێنێت، هەروەها ڕێگری دەکات لە ئابووریی ناڕێکخراو و خۆدزینەوەی باج و سپیکردنەوەی پارە و گەندەڵی. جەختیشی لەوە کردەوە کە نابێت چارەسەرکردنی قەیرانی نەختینە بەتەنها بخرێتە ئەستۆی دیناری دیجیتاڵی، چونکە قەیرانەکە پەیوەندی بە هۆکاری ئابووریی و داراییەوە هەیە، وەک پێکهاتەی بودجە، قەبارەی خەرجییەکان، متمانەی هاووڵاتییان بە کەرتی بانکی و سیاسەتی نەختینەیی.

مەزهەر محەمەد ساڵح باسی لەوەش کرد کە بانکی ناوەندی هەنگاوی باشی بڕیوە لە بواری پارەدان بەشێوەی ئەلیکترۆنی، بەڵام دەرکردنی دراوی دیجیتاڵیی نیشتمانی پێویستی بە تەواوکردنی چوارچێوە یاسایی و یاسادانانەکان، بەهێزکردنی ئاسایشی ئەلیکترۆنی (سایبەر) و ژێرخانێکی تەکنەلۆژیی بەهێز هەیە.

لە بارەی شێوازی دابەشکردنی مووچەوە وتی: "لە ڕووی تەکنیکییەوە دەکرێت مووچەی فەرمانبەران و خانەنشینان بەشێوەی دیجیتاڵی بدرێت و بخرێتە ناو جزدانی دیجیتاڵییەوە، بەڵام سەرکەوتنی ئەمەش بەندە بە فراوانکردنی خزمەتگوزارییە بانکییەکان لە سەرجەم پارێزگاکان، زیادکردنی ئامێرەکانی پارەدان، باشترکردنی هێڵەکانی ئینتەرنێت و بەرزکردنەوەی ئاستی ڕۆشنبیریی دارایی دیجیتاڵی لای هاووڵاتییان."