دەستەی گشتیی گومرگی عێراق ئاشکرای دەکات، لە حەوت مانگی سەرەتای ئەمساڵدا، داهاتی گومرگ گەیشتووەتە دوو ترلیۆن و نیو دینار، کە ئەمەش یەکسانە بە کۆی گشتیی داهاتی ساڵی رابردوو و هۆکارەکەشی بۆ جێبەجێکردنی سیستمی ئەلیکترۆنیی ئەسیکۆدا دەگەڕێنێتەوە.

سامر قاسم تائی، بەڕێوەبەری گشتیی دەستەی گشتیی گومرگ لە لێدوانێکی رۆژنامەوانیدا رایگەیاند: "داهاتی گومرگ بۆ بەرزترین ئاست بەرزبووەتەوە و تا ئێستا بڕی دوو ترلیۆن و نیو دیناری تێپەڕاندووە". ئاماژەی بەوەش کرد، تەنها لە مانگی تەممووزی رابردوودا داهاتی گومرگ گەیشتووەتە (500) ملیار و (600) ملیۆن دینار، کە بەراورد بە هەمان مانگی ساڵی رابردوو، بە رێژەی (150%) زیادیکردووە.

بەڕێوەبەری گشتیی گومرگ پێشبینی دەکات تا کۆتایی ئەمساڵ، داهاتەکان سێ ترلیۆن و نیو دینار تێپەڕێنن، کە دەبێتە بەرزترین ئاستی داهات لە مێژووی دامەزراندنی دەوڵەتی عێراقدا. روونیشیکردەوە، ئەم دەستکەوتە گەورەیە بەهۆی جێبەجێکردنی سیستمی ئەسیکۆدا و بەستنەوەی ئەلیکترۆنیی سەرجەم مەرزە گومرگییە فیدراڵییەکانەوە بەدەستهاتووە.

سیستمی ئەسیکۆدا، پرۆگرامێکی ئەلیکترۆنیی جیهانییە بۆ بەڕێوەبردنی گومرگ و لەلایەن نەتەوە یەکگرتووەکانەوە پەرەی پێدراوە. حکوومەتی عێراق بە مەبەستی رێکخستنەوەی داهاتە نانەوتییەکان، نەهێشتنی گەندەڵی لە دەروازە سنوورییەکان، شەفافیەت و رێگریکردن لە دەستکاریکردن و ساختەکاریی پسوولەکان دەستی بە جێبەجێکردنی سیستمەکە کردووە. لە ئێستاشدا حکوومەت هەوڵ دەدات سیستمەکە لە سەرجەم خاڵە سنوورییەکان جێگیر بکات، بە ئامانجی کۆنترۆڵکردنی یەکجاریی جووڵەی بازرگانی، کەمکردنەوەی قاچاخی و رێگریکردن لە خۆدزینەوە لە باج.