ماڵپەڕێکی عێراقی لەزاری لێکۆڵەرێک ئاشکرای دەکات کە  لێدوانەکانی ئەم دواییەی نەتانیاهۆ لەسەر" لەناوبردنی میحوەری ئێران" عێراق بەهۆی بونی گروپە چەکدارەکانەوە دەکەوێتە مەترسییەکی گەورەوە.

هەواڵ:KNN

ئاژانسی البغداد الیوم لە زاری حسێن ئەلئەسەد لێکۆڵەری کاروباری ستراتیژی بڵاویکردوەتەوە کە "  لێدوانەکانی ئەم دواییەی نەتانیاهۆ کە تیایدا بانگەشەی ئەوەی کردبو کە ئیسرائیل دوژمنەکانی دەشکێنێت و هەوڵی لەناوبردنی میحوەرەکەی ئێران دەدات، کاریگەریی مەترسیداری لەسەر داهاتوی هاوسەنگییە ناوچەییەکان هەیە، ئەم لێدوانانە تەنها پەیامی میدیایی نین، بەڵکو ڕەنگدانەوەی ڕەوتی ڕونی ئیسرائیلە بۆ چڕکردنەوەی فشارەکان لەسەر ئێران و هاوپەیمانەکانی لە ناوچەکەدا، عێراقیش بێبەری نییە لە کاریگەرییەکانی، چ لەسەر ئاستی حکومەت و چ لەسەر ئاستی گروپە چەکدارەکان ".

ناوبراو زیادی کرد: عێراق دەکەوێتە نێو ئەو بازنەیەی کە نەتانیاهۆ بەم هەڕەشەیە کردوویەتییە ئامانج، مەرج نییە وەک وڵاتێک ڕاستەوخۆ بێت، بەڵکو لە ڕێگەی گروپە چەکدارەکانی نزیک لە ئێران و چالاک لە سەر گۆڕەپانی عێراق، ئەم گروپانە بە بەشێک لەو شتە دادەنرێت کە بە ‘میحوەری بەرخۆدان’ ناسراوە.

ئەلئەسەد لە درێژەی قسەکانیدا وتی: عێراق وەک دەوڵەتێکی فەرمی هەوڵدەدات خۆی لە ململانێی ڕاستەوخۆ لەگەڵ ئیسرائیل بەدور بگرێت، بەڵام بونی گروپە چەکدارەکان لە دەرەوەی کۆنترۆڵی تەواوی حکومەت دەیخاتە پێگەیەکی هەستیار و بەرکەوتەی لێکەوتەکانی هەڕەشەی ئیسرائیل، تەنانەت ئەگەر لایەنێکی فەرمیی ململانێکانیش نەبێت.

دەشڵێت" ئەم گروپانە عێراق دەکەنە ناوچەیەکی هەستیار کە ئەگەری پەرەسەندنی گرژییەکانی نێوان تاران و تەلئەبیب، دەتوانێ بکەوێتە ژێر گوشار یان ئامانجی ئیسرائیل".