کەتیبەکانی حیزبوڵای عێراق، هەڕەشە لە ئەمەریکا دەکات و رایدەگەیەنێت، ئەگەر راستەوخۆ بچێتە جەنگەوە بەرامبەر ئێران، هەمو هێز و بەرژەوەندییەکانیان دەکەنە ئامانج.

هەواڵ:KNNC

ئەبو عەلى عەسکەرى، بەرپرسى ئەمنیی حیزبوڵا، لە بەیاننامەیەکدا، ئیدانەى وتەکانى سەرۆکى ئەمەریکاى کرد لە بارەى جەنگى ئیسرائیل و ئێرانەوە و رایگەیاند: ئەگەر بڕیار بدات، راستەوخۆ بچێتە جەنگەوە بەرامبەر ئێران، وەڵامێکى فراوانى دەدەنەوە و هەمو بەرژەوەندییەکانى لە ناوچەکە دەکەنە ئامانج.

بەرپرسەکەى حیزبوڵا دەشڵێت: ئێران، هەمو توانایەکى بۆ وەڵامدانەوەى ئیسرائیل و موشەکبارانکردنى ناوچەکانى ئیسرائیل هەیە بۆ ماوەى زیاتر لە ساڵێک و دەشتوانێ هەمو پێگەکانى ئەمریکا لە ڕۆژئاواى ئاسیا، بکاتە ئامانج.

ئەبو عەلى عەسکەرى، باسى لەوەش کرد، ئەمریکا ڕاستەوخۆ بچێتە جەنگەوە، دەرگاى ئێش و ئازارێکى زۆر بە ڕوى خۆیدا دەکاتەوە و بەرژەوەندییە ئابورى و ستراتیژییەکانى ئەمریکا زیانێکى زۆریان بەردەکەوێت، کە بە خەونى ترلیۆنەکانى سەرۆکى ئەمریکا وەسفى کردون.

بەرپرسە ئەمنییەکەى حیزبوڵا جەختى کردوەتەوە، بەرەى مقاوەمە لە عێراق، لەوپەڕى ئامادەباشیدایە بۆ وەڵادانەوەى هەر هەڕەشەیەکى ناوخۆیی و دەرەکى لەسەر سەقامگیریی سیاسیى و ئاسایشى عێراق.