لەگەڵ دەستپێکردنى شەڕ لەگەڵ ئێران و لە رابردوشدا، سەرۆک وەزیرانى ئیسرائیل بەردەوام بە سیمبولێکى زەرد بە لاى راستى سنگییەوە دەردەکەوێت، سەربارى هەڕەشە بەردەوامەکانى چاو دەچێتەسەر پەیامە بێدەنگەکانیش، ئەو سیمبولە چییە و بۆچى نەتەنیاهۆ زۆرینەى کاتەکان دەیکات بە جلوبەرگەکانییەوە؟

زانیاریی:KNNC

سیمبولێکە لە شێوەى شریتێکى زەرد، ئەم سیمبولە بۆ چەندین هۆکار بەکاردێت، بەڵام دیارترینیان بۆ پاڵپشتیکردنە لە هێزە سەربازییەکان بەتایبەت ئەوانەى لە دەرەوەى وڵاتەکە خزمەت دەکەن، بڵاوکردنەوەى هۆشیارى دژى خۆکوژیی و ئازادکردنى بارمتەکانیش هۆکارێکى دیکەن، هەربۆیە بەکارهێنانى ئەم سیمبولە بەپێی کات و شوێن دەگۆڕێت.

ئەمانە بەشێکن لە دیارترین هۆکارەکانى بەکارهینانى شریتى زەرد:

پشتیوانیکردنى سەرباز و هێزە سەربازییەکان:
شریتى زەرد لەکاتى جەنگى کەنداو لە ساڵانى 1990 بەکارهێنانى بەربڵاوبو، وەک هێمایەک بۆ پشتگیریکردن لە هێزەکانى ئەمەریکا بەکارهات کە لە رۆژهەڵاتى ناوەڕاست بون و وەک هیوایەکە بۆ گەڕانەوەى ئەو سەربازانە بە سەلامەتیی بۆ وڵاتەکەیان و تا ئێستاش لە ململانێ سەربازییەکاندا بەکاردێت.

ئازادکردنى بارمتەکان:
شریتى زەرد وەک هێمایەک بۆ ئازادکردنى بارمتەکان بەکاردێت، لە دەستپێکى هێرشەکانى ئیسرائیل بۆسەر غەززەوە لەلایەن سەرۆک وەزیرانى ئیسرائیل و بەشێک لە بەرپرسانى وڵاتەکەوە وەک هێمایەک بۆ ئازادکردنى بارمتەکان لەلایەن حەمماسەوە بەکاردێت، ئەم هێمایە بۆ پشتگیریکردن و هاوخەمییە هەم بۆ بارمتەکان و هەم بۆ خێزانەکانیان.



هەندێک لە مەبەستەکانى دیکەى ئەم هێمایە:
دەکرێت ئەم هێمایە ئاماژەبێت بۆ بڵاوکردنەوەى هۆشیارى دژى جینۆساید، شێرپەنجە، بەخشینى ئەندامەکانى لەش بە کەسانى پێویست، هەربۆیە بەکارهێنانى دەکەوێتەسەر ئەو کات و شوێنەى کەسەکان تێیدا بەکاردەهێنن و لە ئێستادا بەهۆى ئەوەى ئیسرائیل نزیکەى دوو ساڵە هێرشى بۆسەر غەززە و ئێستاش بۆسەر ئێران دەستپێکردوە، هۆکارى بەکارهێنانى ئەم سیمبولە زیاتر سەربازییە.