قائیمقامیەتی سلێمانی رایدەگەیەنێت: بەهۆی پابەندنەبونیان بەڕێنماییەكانی كاركردن و هەبونی پاشەڕۆی قرتێنەرەكان لە شوێنەكانیاندا چێشتخانەیەك و نۆرینگەیەكیان داخستوە.


هەواڵ: (KNNC)


قائیمقامیەتی سلێمانی لە تۆڕی كۆمەڵایەتی فەیسبوك بڵاویكردوەتەوە؛ بەهۆی پابەندنەبونیان بەرێنماییەكانی كاركردن بەگشتی و مەرجەكانی تەندروستی بەتایبەتی، لیژنەكانیان چێشتخانەی حاجی لە گەڕەكی سەرچنار و نۆرینگەیەكیان لە گەڕەكی كانی با داخستوە.


ئەوەیخستوتەڕو، له‌راپۆرتی كارچالاكی رۆژانه‌ی لیژنه‌ی باڵادا هاتوه‌؛ به‌هۆی پابه‌ندنه‌بون به‌رێنماییه‌كان و لەكاتی سه‌ردانی لیژنه‌كه‌، بۆ كۆگای ئاماده‌كردنی خوارده‌مه‌نییه‌كان له‌ چێشتخانه‌كه‌دا، تێبینی كراوه‌ كه‌ پابه‌‌ندی مه‌رجه‌كانی ته‌ندروستی نابێت و له‌کۆگاکەیدا پاشه‌ڕۆی قرتێنه‌ركان هه‌بوه‌.


راشیگەیاندوە: هۆكاری داخستنی نۆرینگەكە بۆ نەبونی هیچ یەكێك لە مەرجەكان تەندروستی، بونی دەرمانی زۆر کە نابێت لەم شوێنانە بفرۆشرێن و گەرمبونی شوێنی هەڵگرتنی دەرمانەکان دەگەڕێتەوە.


قائیمقامیەتی سلێمانی رونیكردوەتەوە، سەرباری ئەوەی كە كۆگاكە پاشەڕۆی قرتێنەرەكانی تێدابوە بەشێكی دیكە لە دەرمانەكانی نۆرینگەكە، نایاسایی و قەدەغەكراوبون، بۆیە هەردو شوێنەكە داخراون و خاوەنەكانیشیان روبەڕوی رێكاری یاسایی دەكرێنەوە.


سلێمانی – بەهار عەبدولكەریم