شێواندنی فۆلكلۆر

كاری وەزارەتی ڕۆشنبیری، هاوكاری و پێشخستن و گەشەپێدانی بواری رۆشنبیرییە بەهەموو بەشەكانیەوە، جگە لەوەش، چاودێریكردن و سەرپەرشتیكردن و دانانی پلانی نزیك مەوداو دوورمەودایە، بۆ بەئامانجگرتن و خستنەڕووی پێشخستن و جوانیەكانی  كۆمەڵگە لەڕێگەی هونەرو ئەدەب و ژانرە جیاوازەكانەوە، تا لەو سۆنگەیەوە كۆمەڵگە گەشە بكات و نمونەیەكی گەش بەمرۆڤایەتی  نیشان بدات، هەربۆیە (ئارنەست فیشەر) ی نوسەرو توێژەر وتوێتی ( هونەر لەگەڵ مرۆڤدا هاتووە، تا باشترو جوانتر لە ژیان بگات و بیگۆڕێ‌).

 

لەم وتەیەدا( فیشەر) هونەری  وەك هێمای ڕۆشنبیری، ئەدەب و ژانرەكانی تربەكارهێناوە و جیای نەكردۆتەوە، لەڕاستیدا ڕیكلامكردنیش هونەرە، بەڵام ئەگەر بەشێوازی زانستی و بەپێی ڕێنمایی ئەنجام بدرێت، ڕاستە لە ئەمڕۆدا زۆربەی ڕیكلامەكان بۆمەبەستی بازرگانیە، هەرچەند ڕێپێدراو یاساییە، ئەوەی سەرنجی منی بۆلای خۆی كێشكردوە، ڕیكلامەكانی ئەمڕۆی  میدیای كوردییە، هەركە سەیری تیڤی ئەكەی هزرت ئەشێوێ‌ بەهۆی ڕیكلامە بێ سەروبەرەكانی  برنج، چا، دۆشاو و جلوبەرگ  و ...هتد، ئەویش بەهۆی  نادروستی و شێوازی  خراپ بەكارهێنانی چەند بابەتێك، بەتایبەتی گۆرانیە جوان و پڕ یادگاریە فۆلكلۆریەكان و شێواندنی  وشە و ئاوازو دەربڕینەكان بەمەبەستی  ڕاكێشانی كڕیاران و ساغكردنەوەی ئەو كاڵایانە.

 

 

هونەری گۆرانی  زیندووترین هونەری  ناساندنی شوناس و كەلتوری گەلانە، هەروەك ، فەیلەسوفی  چینی ( كۆنفیشیۆس) وتوێتی: ( ئەگەر ئەتەوێ‌  شارەزای كەلتورو ڕۆشنبیری نەتەوەیەك ببیت، گوێ‌ لەگۆرانیەكانی بگرە)، زۆرجار ڕێكەوتووە گۆرانی بێژێك یەكێك لەگۆرانیەكانی  بخاتە خزمەتی ڕیكلام بەمەرجێك ، ئاوازەكەی  فۆلكلۆر نەبێت، تا ئەو ئاوازە  لە دیدی گۆیگر نەڕوات و جوانیەكانی  كاڵنەبێتەوە، هەندێ‌ گۆرانی و ئاواز هەن، كە موڵكی نەتەوەن و بونەتە بەشێك لەمێژووی هونەری ڕەسەن، نمونە گۆرانی

( شەمامەو خاڵخاڵ) چۆن ئەشێ‌ بكرێتە ڕیكلامی برنج ؟ لەكاتێكدا ئەوە نەشیاوە و ناكرێ‌ ڕێ بەو كارە بدرێ‌، بەڵام  پرسیارەكە ئەوەیە كێ‌ ڕێگربێت لەشێواندنی هونەری فۆلكلۆری نەتەوەكەمان؟.

 

 

ئەگەر وەزارەتی ڕۆشنبیرییە بۆ بێ‌ دەنگ و بێ‌ هەڵوێستە لەو كارانەو دەیان كاری تری میدیای بەتایبەت لەهەندێ‌ كەناڵی تیڤی ؟  لێرەوە داوا لە بەڕێز وەزیری ڕۆشنبیری حكومەتی هەرێمی كوردستان  كاك (حەمەی حەمە سەعید) دەكەم، وەك كارێكی  گرنگی وەزارەتەكەی بڕیارێك  دەربكات و هەموو كەناڵەكانی ڕاگەیاندن ئاگاداربكاتەوە، لە چۆنێتی مامەڵە كردنی وورد لەگەڵ هونەری فۆلكلۆری كوردی و نەشێواندنی لەلایەن چەند كەسێكی خەمسارد و بێ‌ ئاگا، كە بۆبەرژەوەندی تایبەت ئەو ئاوازانە نەخەنە خزمەت  بازرگانی  و كاری تایبەتیەوە.

297 جار خوێندراوەتەوە