ئاستی هەناردەکردنی نەوتی عێراق لە مانگی تشرینی یەکەمی ڕابردوودا بەڕێژەی ٪9.5 بەرزبوونەوەی بەخۆیەوە بینی و گەیشتە 3.35  ملیۆن بەرمیل لە ڕۆژێکدا، بەمەش ئاستی هەناردە لە قەبارەکانی پێش دەستپێکردنی جەنگ نزیک بووەتەوە. هاوکات، وڵاتانی عەرەبیی بەرهەمهێنەری نەوت لە کەنداو هەناردەیان زیادکردووە و ئەمەش وایکردووە فشارەکانی سەر نرخی نەوت لە بازاڕەکانی جیهاندا کەم ببنەوە.

بەپێی داتاکانی ئاژانسی بلومبێرگ، عێراق لەسەر ئاستی وڵاتانی کەنداو دووەم گەورەترین زیادبوونی تۆمارکردووە. هەناردەکردنی نەوت لە بەندەری بەسرەوە بەرزبووەتەوە و لە ڕێڕەوی باکووریشەوە کە بە تورکیادا تێدەپەڕێت، قەبارەی هەناردە نزیکەی دوو هێندە زیادی کردووە. لەسەر ئاستی گشتیش، هەناردەی عێراق، سعودیە، ئیمارات و کوەیت بەڕێژەی ٪10 بەرزبووەتەوە و گەیشتووەتە 15.53 ملیۆن بەرمیل لە ڕۆژێکدا.

لە بەرامبەر ئەم بەرزبوونەوەیەدا، بۆ دووەم مانگ لەسەریەک بەهۆی گەمارۆ دەریاییەکانی ئەمریکاوە، هیچ بڕە نەوتێکی ئێران هەناردەی بازاڕەکان نەکراوە و پشکی ئەو وڵاتە سفر بووە. ئەم پێشهاتانە لە کاتێکدان کە نرخی یەک بەرمیل نەوتی برێنت لە نزیک 106 دۆلار مامەڵەی پێوەدەکرێت و وڵاتانی ئۆپێک پڵاسیش خۆیان بۆ کۆبوونەوەی 29ی ئەم مانگە ئامادە دەکەن، بۆ پێداچوونەوە و دیاریکردنی پشکی بەرهەمهێنانی ساڵی 2027.