وەزارەتی دارایی ڕایگەیاند، ڕۆژی یەکشەممە 18ی تشرینی یەکەمی 2026 دەست بە دابەشکردنی مووچەی مانگی ئەیلوولی مامۆستایانی گرێبەست و بەشێک لە فەرمانبەرانی هەمیشەیی و گرێبەست دەکرێت.

بەپێی ڕاگەیەندراوەکەی وەزارەتی دارایی، دابەشکردنی مووچەی مامۆستایانی گرێبەستی هەردوو وەزارەتی پەروەردە و خوێندنی باڵا و توێژینەوەی زانستی تا ڕۆژی پێنجشەممە 22ی تشرینی یەکەم بەردەوام دەبێت، و لەو ماوەیەدا سەرجەمیان مووچەکانیان وەردەگرن.

هاوکات لەگەڵ مامۆستایانی گرێبەست، دەست بە دابەشکردنی مووچەی مانگی ئەیلوولی سەرجەم ئەو فەرمانبەرانەش دەکرێت کە لە دوای 1/7/2024ـەوە بە شێوەی گرێبەست و هەمیشەیی لەسەر میلاکی دامەزراوەکانی حکومەتی هەرێم دامەزراون، و شایستە داراییەکانیان لەسەر داهاتی ناوخۆی هەرێمی کوردستان خەرج دەکرێت.