بەڕێوەبەرایەتیی کەشناسی و بوومەلەرزەزانیی هەرێمی کوردستان پێشبینییەکانی کەشوهەوای بۆ 48 کاتژمێری داهاتوو بڵاوکردەوە و ڕایدەگەیەنێت، ئەگەری نمەباران لە چەند ناوچەیەکی جیاواز هەیە و پلەکانی گەرماش بە جێگیری دەمێننەوە.

بەپێی پێشبینییەکان، ئەمڕۆ شەممە ئاسمان نیمچەهەور دەبێت، لە کاتەکانی بەیانیدا ئەگەری نمەباران لە ناوچە سنوورییەکانی ڕۆژهەڵاتی هەرێم لە سنووری پارێزگاکانی سلێمانی و هەڵەبجە و بەشێک لە ئیدارەی گەرمیان هەیە، خێرایی باش لە مامناوەنددا دەبێت.

بۆ سبەینێ یەکشەممە، کەشناسی پێشبینی دەکات لە کاتەکانی شەودا ئاسمانی ناوچە شاخاوییە سنوورییەکانی باکوور و باکووری ڕۆژئاوا بۆ هەوری تەواو بگۆڕێت، لە دوای نیوەشەویشەوە بارانبارین لەو ناوچانە دەستپێدەکات. بەرزترین پلەی گەرماش لە گەرمیان تۆماردەکرێت کە 35 پلەی سیلیزییە و نزمترینیش لە حاجی ئۆمەران دەبێت بە 21 پلە.