ئەنجومەنی باڵای دادوەریی عێراق، ئامارێکی نوێی فەرمی لەبارەی حاڵەتەکانی هاوسەرگیری و جیابوونەوە بۆ مانگی ئابی 2026 ئاشکرا کرد، کە تێیدا پێنج هەزار و 775 حاڵەتی تەڵاق تۆمارکراون، بەمەش تێکڕای جیابوونەوە دەگاتە یەک حاڵەت لە هەر 7.5 خولەکێکدا.

بەپێی داتاکانی ئەنجومەنەکە، کۆی گشتیی گرێبەستەکانی هاوسەرگیری و پەسەندکراو لەو مانگەدا گەیشتووەتە 21 هەزار و 133 گرێبەست. پارێزگای نەینەوا بە تۆمارکردنی سێ هەزار و 365 گرێبەست لە ڕیزبەندی یەکەمدایە، دواتر ڕەسافە بە دوو هەزار و 680 گرێبەست و کەرخ بە دوو هەزار و 339 گرێبەست دێن.

لەسەر ئاستی تەڵاق و جیابوونەوەی دادوەریش، دادگای تێهەڵچوونەوەی بەغدا/ڕەسافە بە هەزار و 124 حاڵەت لە پلەی یەکەمدایە، دوای ئەویش کەرخ بە هەزار و 113 حاڵەت دێت، لەکاتێکدا نەینەوا لە هەمان ماوەدا 645 حاڵەتی جیابوونەوە تۆمارکردووە.

شارەزایانی بواری کۆمەڵایەتی و یاسایی، هۆکاری بەرزبوونەوەی ڕێژەی جیابوونەوە بۆ پاڵەپەستۆ ئابوورییەکان، هاوسەرگیریی پێشوەختە، خراپ بەکارهێنانی سۆشیال میدیا و جیاوازیی هزریی نێوان هاوسەرەکان دەگەڕێننەوە. هاوکات داواکارن پێش پەسەندکردنی بڕیاری دادگا، ڕۆڵی سەنتەرەکانی ڕێنمایی خێزانی کارا بکرێت بۆ چارەسەرکردنی ئەم دیاردەیە.