فەرماندەیی پۆلیسی دیالە، ئەمڕۆ دووشەممە، دەستگیرکردنی باندێکی ڕاگەیاند کە تایبەت بوون بە قاچاخچێتی و گواستنەوەی ئۆتۆمبێلی بێسەرەتا لە شاری بەغداوە بۆ هەرێمی کوردستان.

لە بەیاننامەیەکدا فەرماندەییەکە ئاماژەی بەوەکردووە، پاش بەدەستهێنانی زانیاریی وردی هەواڵگری و وەرگرتنی ڕەزامەندیی دادگا، هێزەکانیان بەدواداچوونیان بۆ جوڵەی ئەو باندە کردووە کە مامەڵەیان بە ئۆتۆمبێلی بێسەرەتا و نایاساییەوە کردووە. ڕوونیشیکردووەتەوە، لە ڕێگەی دانانی بۆسەیەکی تووندوتۆڵ لەسەر ئەو ڕێگایەی بۆ قاچاخچێتییەکە بەکاریدەهێنن، توانراوە ئەندامانی باندەکە لەکاتی ئەنجامدانی تاوانەکەدا دەستگیربکرێن و دەستیشبگیرێت بەسەر دوو ئۆتۆمبێلی بێسەرەتادا.

پۆلیسی دیالە ئەوەشی خستووەتەڕوو، لە کاتی پشکنیندا دەستگیراوە بەسەر کۆمەڵێک پەڕاو و تۆماری تایبەت بە کڕین و فرۆشتن، کە وردەکاریی گواستنەوە و قاچاخچێتیی ژمارەیەک ئۆتۆمبێلی دیکەی بێسەرەتای تێدایە کە پێشتر گواستراونەتەوە. هاوکات لە لێکۆڵینەوە سەرەتاییەکاندا تۆمەتباران بەڕوونی دانیان بە تاوانەکەیاندا ناوە و ڕێکاری یاسایی پێویست بەرامبەریان گیراوەتەبەر بۆ تەواوکردنی ڕێکارە دادوەرییەکان.