عەلی فالح زەیدی، سەرۆک وەزیرانی عێراق، ئەمڕۆ یەکشەممە، ڕایگەیاند؛ حکومەتەکەی کار دەکات بۆ کردنەوەی دەرگای نوێی هاریکاری و وەبەرهێنان لەگەڵ پاریس و بەرلین، ئەوەش لە چوارچێوەی سەردانێکی فەرمیدا بۆ ئەو دوو وڵاتە.

نووسینگەی ڕاگەیاندنی سەرۆک وەزیران لە بەیاننامەیەکی ڤیدیۆییدا بڵاویکردووەتەوە، عەلی فالح زەیدی بە سەرۆکایەتیی شاندێکی باڵای فەرمی، سەردانێک بۆ فەڕەنسا و ئەڵمانیا ئەنجام دەدات. ئاماژەی بەوەشکردووە، پێویستە عێراق پێگەی خۆی بگەڕێنێتەوە و پەیوەندییەکانی لەسەر بنەمای بەرژەوەندیی هاوبەش بونیاد بنێتەوە.

بەپێی بەیاننامەکە، سەرۆک وەزیران جەختی لەوە کردووەتەوە کە لەگەڵ پاریس دەرگای نوێ بۆ هاریکاری، وەبەرهێنان و گەشەپێدان دەکەنەوە. هەروەها سەبارەت بە پەیوەندییەکانیان لەگەڵ ئەڵمانیا وتویەتی: "لەگەڵ بەرلین کار دەکەین بۆ دامەزراندنی هاوبەشی لە بوارەکانی مەعریفە، تەکنەلۆجیا و پیشەسازی کە لەسەر بنەمای بەرژەوەندیی هاوبەش و گەشەپێدان دامەزرابێت."

لە کۆتاییشدا زەیدی ئەوەی خستووەتەڕوو، ئەمڕۆ عێراق بە متمانەوە دەڕوانێتە جیهان و کار دەکات بۆ بونیادنانی هاوبەشیی ڕاستەقینە، بە جۆرێک کە تواناکانی بکاتە هێزێکی ئابووری و هەرێمیی کارا لە ناوەندە نێودەوڵەتییەکاندا.