وەزارەتی تەندروستیی عێراق، ئەمڕۆ دووشەممە، ئاماری کۆتایی قوربانییانی ڕووداوی دزەکردنی غازی ئەمۆنیای لە یەکێک لە کارگەکانی پارێزگای بەسرە ڕاگەیاند کە بەهۆیەوە دوو کەس گیانیان لەدەستداوە و 114 کەسی دیکەش برینداربوون.

سەیف بەدر، وتەبێژی وەزارەتی تەندروستی لە لێدوانێکدا ڕایگەیاند: چارەسەری خێرا بۆ سەرجەم بریندارەکان کراوە و خزمەتگوزاریی پزیشکیی پێویستیان پێشکەش کراوە، هەروەها بە ڕاسپاردەی عەبدولحوسێن موسەوی، وەزیری تەندروستی، چاودێری وردی ڕەوشی تەندروستییان دەکرێت.

ئاماژەی بەوەشکرد، بۆ بەهاناوەچوونی قوربانییان و گواستنەوەیان بۆ نەخۆشخانەکان، زیاتر لە 50 ئامبوڵانس ڕەوانەی شوێنی ڕووداوەکە کراون.

سەبارەت بە ڕەوشی تەندروستیی بریندارەکانیش، وتەبێژەکەی وەزارەتی تەندروستی ڕوونیکردەوە: "لە ئێستادا تەنها 21 بریندار لە نەخۆشخانەکاندا ماونەتەوە؛ 12 بریندار لە نەخۆشخانەی زوبێر، دوو بریندار لە نەخۆشخانەی سەیاب و حەوت بریندار لە نەخۆشخانەی کوێتین، بێجگە لە یەک بریندار نەبێت، ڕەوشی تەندروستیی سەرجەم قوربانییەکانی دیکە جێگیرە".