شانەی ڕاگەیاندنی ئەمنی، ئەمڕۆ یەکشەممە، دەستپێکردنەوەی هاتووچۆی گەشتیاران و جووڵەی بازرگانیی لە دەروازەکانی شیب، شەلەمچە و مەندەلی ڕاگەیاند، ئەوەش لەسەر ڕاسپاردەی عەلی فالح زەیدی، سەرۆک وەزیران و فەرماندەی گشتیی هێزە چەکدارەکان.

شانەکە لە بەیاننامەیەکدا ئاماژەی بەوە کردووە، بڕیارەکە دوای پێداچوونەوە بە ڕەوشی کاری دەروازە سنوورییەکان و دیاریکردنی پێداویستییە ڕێکخراوەیی و هونەرییەکانیان دێت، بە هەماهەنگی لەگەڵ سەرجەم فەرمانگە و دەزگاکانی ناو دەروازەکان، بە جۆرێک کە ئاسایشی دەروازەکان بەهێزتر بکات و لە هەمان کاتدا پارێزگاری لە ئاسانیی جووڵەی بازرگانی و هاتووچۆی هاووڵاتییان بکات.

ئەوەشی خستووەتەڕوو: "کاتی تەواوکردنی پێداویستییە ڕێکخراوەیی و نۆژەنکردنەوەکان لە دەروازەکانی شەلەمچە، مەندەلی و شیب دیاریکراوە، وەک ئامادەکارییەک بۆ دەستپێکردنەوەی کارەکان بەپێی ڕێکارە پێویستەکان، بە شێوەیەک کە بەرزترین ئاستی ڕێکخستن، کۆنتڕۆڵکردن و ئاسانکاری بێتە دی."

هەروەها ڕوونیکردووەتەوە، دوای هەماهەنگیی نێوان نووسینگەی فەرماندەی گشتیی هێزە چەکدارەکان و دەستەی دەروازە سنوورییەکان سەبارەت بە ڕێکخستن و تەواوکردنی نوێکردنەوەی سیستم، بەرنامە و ڕێکارە پەسەندکراوەکانی کارکردن لەو دەروازانەدا، ئەم بڕیارانە دراون:

１.دەستپێکردنەوەی هاتووچۆی گەشتیاران لە هەردوو دەروازەی (شیب و شەلەمچە) لە کاتژمێر (6:00)ی بەیانیی ئەمڕۆ یەکشەممەوە (13ی ئەیلوولی 2026)

２.دەستپێکردنەوەی جووڵەی بازرگانی لە دەروازەی شەلەمچە لە کاتژمێر (6:00)ی بەیانیی ڕۆژی دووشەممەوە (14ی ئەیلوولی 2026)

３.دەستپێکردنەوەی جووڵەی بازرگانی لە دەروازەی مەندەلی لە کاتژمێر (6:00)ی بەیانیی ڕۆژی سێشەممەوە (15ی ئەیلوولی 2026).

４.دەستپێکردنەوەی جووڵەی بازرگانی لە دەروازەی شیب لە کاتژمێر (6:00)ی بەیانیی ڕۆژی پێنجشەممەوە (17ی ئەیلوولی 2026).

لە کۆتاییشدا شانەکە جەختی لەوە کردووەتەوە کە "جووڵەی گەشتیاران و بازرگانی لەگەڵ لایەنی ئێرانیدا نەوەستاوە و، کارکردن بە درێژایی 24 کاتژمێر لە هەردوو دەروازەی زرباتیە و مونزریە بەردەوامە."