بەڕێوەبەرایەتیی گشتیی کەشناسی و بوومەلەرزەزانیی هەرێمی کوردستان پێشبینییەکانی کەشوهەوای بۆ 48 کاتژمێری داهاتوو بڵاوکردەوە و ڕایدەگەیەنێت، ئەمڕۆ پلەکانی گەرما دادەبەزن و ئەگەری بەرزبوونەوەی تۆز و خۆڵێکی سووک هەیە.

بەپێی پێشبینییەکانی کەشناسی، ئەمڕۆ دووشەممە ئاسمان لە نێوان ساماڵ و پەڵەهەور بۆ نیمچەهەور دەبێت، بەتایبەتی لە ناوچەکانی ڕۆژهەڵاتی هەرێم. لە کاتەکانی ئێوارە و شەودا ئەگەری بەرزبوونەوەی تۆز و خۆڵێکی سووک هەیە کە مەودای بینین بۆ 5 تا 7 کیلۆمەتر کەمدەکاتەوە. هەروەها پلەکانی گەرما بەراورد بە دوێنێ 1 بۆ 2 پلە نزم دەبنەوە، جگە لە سنووری گەرمیان کە کەمێک بەرز دەبێتەوە و دەگاتە 46 پلەی سیلیزی.

کەشناسیی هەرێم سەبارەت بە کەشوهەوای سبەینێ سێشەممە ئاماژەی بەوە کردووە، ئاسمان بەگشتی ساماڵ دەبێت و مەودای بینین بۆ 8 تا 10 کیلۆمەتر بەرز دەبێتەوە. هاوکات پلەکانی گەرما نزیک دەبن لە تۆمارەکانی ئەمڕۆ، بە جۆرێک لە هەولێر 42، لە سلێمانی 41، لە دهۆک 41 و لە هەڵەبجە 43 پلەی سیلیزی دەبێت، بەرزترین پلەی گەرماش لە گەرمیان دەبێت کە 47 پلەیە و نزمترینیش لە حاجی ئۆمەران دەبێت بە 35 پلەی سیلیزی.