لیژنەی باڵای تایبەت بە جێبەجێکردنی خاڵەکانی رێککەوتنی ئەمنیی هاوبەشی نێوان کۆماری عێراق و کۆماری ئیسلامیی ئێران، ئەمڕۆ شەممە، لە شاری هەولێر کۆبوونەوەی خۆی ئەنجامدا.

نووسینگەی راگەیاندنی راوێژکاری ئاسایشی نەتەوەیی لە راگەیەندراوێکدا بڵاویکردەوە، لیژنەی باڵای تایبەت بە جێبەجێکردنی رێککەوتنە ئەمنییەکەی نێوان عێراق و ئێران لە هەولێر کۆبووەتەوە، تێیدا قاسم عەبوودی، راوێژکاری ئاسایشی نەتەوەیی سەرۆکایەتیی شاندی باڵای ئەمنیی عێراق و رێبەر ئەحمەد، وەزیری ناوخۆی هەرێمی کوردستانیش سەرۆکایەتیی شاندی هەرێمی کردووە.

بەپێی راگەیەندراوەکە، لە کۆبوونەوەکەدا گفتوگۆ لەبارەی وردەکاری و خاڵەکانی رێککەوتنە ئەمنییە هاوبەشەکەی نێوان هەردوو وڵات کراوە، بەتایبەت لە پرسی پاراستنی سنوورەکان، رێگریکردن لە دزەکردن و قاچاخچێتی، هەروەها پاراستنی ئاسایش و سەقامگیری لە سەرتاسەری عێراق.

لە بەشێکی دیکەی کۆبوونەوەکەدا، هەڵسەنگاندن بۆ ئەو خاڵانە کراوە کە تا ئێستا جێبەجێ کراون و جەخت لە پێویستیی بەردەوامیی پەیوەندی و هەماهەنگیی هاوبەشی نێوان حکوومەتی فیدراڵی و حکوومەتی هەرێمی کوردستان کراوەتەوە، ئەوەش پاڵپشت بە رێنماییەکانی فەرماندەی گشتیی هێزە چەکدارەکان بە ئامانجی خزمەتکردنی بەرژەوەندی و سەروەریی عێراق.

پێشتر و لە بەیانیی ئەمڕۆ شەممەدا، قاسم عەبوودی، راوێژکاری ئاسایشی نەتەوەیی بە سەرۆکایەتیی شاندێکی باڵای ئەمنی، بە مەبەستی بەدواداچوون بۆ خاڵەکانی رێککەوتنە ئەمنییە هاوبەشەکەی نێوان عێراق و ئێران گەیشتبووە هەولێر.